Սերժ Սարգսյանը զրահապատ մեքենա է ունեցել, գնալուց տարել է․ Էդուարդ Աղաջանյան․ ՏԵՍԱՆՅՈՒԹ

Վարչապետի աշխատակազմի ղեկավար Էդուարդ Աղաջանյանը չի մեկնաբանում տեղեկությունները, որ վարչապետը նոր մեքենա է գնել 540 հազար դոլար արժողությամբ: Լրագրողներն այսօր Աղաջանյանին հարցրեցին, թե քանի՞ նոր զրահապատ մեքենա է գնվել:

Նա ասաց՝ վստահ չէ, որ այդ տեղեկությունը պետք է հրապարակի, իրավաբանների հետ կխորհրդակցի: Մեր հարցին՝ երբ բյուջեի հաշվին բան է գնվում, թափանցիկ գործելաոճ որդեգրած Կառավարությունն ինչո՞ւ է գաղտնի պահում՝ Աղաջանյանը պատասխանեց. «Նախ՝ գործող օրենք կա, որը վերաբերում է ընթացիկ ներկայացուցչական ծախսերին, որը գաղտնի է, կարելի է քննարկել այդ օրենքի փոփոխման հարցը: Պետք է արձանագրել, որ դրան զուգահեռ՝ կան անվտանգության նորմեր, որոնք այդ օրենքի շրջանակում պահպանվում են, դա կարևոր բաղադրիչն է այդ օրենքի»:

Հարցին՝ մտահոգություն չունի՞, որ այս ճոխ գնումները հանրության մոտ տրամադրություն են ստեղծում, քանի դեռ դուք եք իշխանության, օգտվում եք դրանից՝ Աղաջանյանը պատասխանեց. «Պետք է արձանագրել, որ այն մեքենան, որը սպասարկում էր վարչապետին, բավականին, մեղմ ասած, հին, շարքից դուրս եկած ավտոմեքենա էր, որը դեռևս 5 և ավելի տարի առաջ պետք է ուղղակի դուրս գրվեր: Նաև լուրջ անվտանգության խնդիրներ առաջացնող մեքենա էր»:

Հստակեցնող հարցին՝ այսինքն՝ նախկինները խնայում էին միջոցները և նոր մեքենա չէի՞ն գնում, Աղաջանյանը պատասխանեց, որ այդ ավտոմեքենան այնտեղ դրված էր, չէին օգտագործում. «Նախկիններն իրենց սպասարկողներն ունեին, Սերժ Սարգսյանն իր անհատական ավտոմեքենան ուներ, իրենն էր՝ սեփականը»:

Աղաջանյանն ասաց, որ Լևոն Տեր-Պետրոսյանին, Ռոբերտ Քոչարյանին և Սերժ Սարգսյանին Կառավարությունն ապահովում է մեքենաներով, անվտանգության աշխատակիցներով: Հարցին՝ օգտվո՞ւմ են՝ նա պատասխանեց. «Չգիտեմ, բայց նրանց տրամադրված է»:

Մանրամասները՝ տեսանյութում:

Նարեկ Կիրակոսյան