Նիկոլ Փաշինյանը տեղադրել է  15․000 կտորանոց խճանկարի վերջին կտորը․ գյումրեցի առնվազն երկու անօթևան ընտանիք բնակարան կունենա

Այսօր աշխատանքային այցով Գյումրիում գտնվող Նիկոլ Փաշինյանը, միանալով «Գյումրին առանց տնակների» հիմնադրամի բարեգործական նախաձեռնությանը, տեղադրել  է 15․000 կտորանոց խճանկարի վերջին կտորը՝ ամբողջացնելով նկարը։

Հիշեցնենք, որ «Գյումրին առանց  տնակների» հիմնադրամը ՀՀ մշակույթի վաստակավոր գործիչ Սուսաննա Մկրտչյանի՝ «Իմ հոգու տուն, Գյումրի» շարքի կտավներից մեկը վերածել էր 15.000 կտորանոց խճանկարի, որի ամեն կտորը հնարավոր էր գնել 1000 դրամով ու օգնել գյումրեցի անօթևաններին՝ բնակարան ունենալ: Ինչպես և նախատեսվում էր՝ խճանկարը ամբողջացել էր  սեպտեմբերի 21-ին՝ Հայաստանի Անկախության օրը։ Մնացել էր ընդամենը 1 կտոր, որն էլ այսօր տեղադրեց վարչապետը։ Ի դեպ՝ բարեգործական այս ակցիայի առաջին մասնակիցը հենց Նիկոլ Փաշինյանն է, առաջին տասը կտորները գնել էր վարչապետը։

Խճանկարի կտորների վաճառքից հավաքվել է 15 մլն դրամ, որով նախատեսվում է առնվազն երկու անօթևան ընտանիքի համար բնակարան գնել։

«Ամենը կախված է շահառուների ցանկից։ Եթե բազմանդամ ընտանիքներ կլինեն, որտեղ անչափահասները շատ են՝ 3-4, պարզ է, որ 2 կամ 3 սենյականոց բնակարան պիտի գնենք։ Բայց եթե մարդկանց թիվը քիչ եղավ, 3 բնակարան լինի՝ մեկական բնակարան՝ մեկ, երկու և երեք սենյականոց: Կախված է խորհրդի որոշումից, թե ում կընտրենք որպես ծրագրի շահառու»,-  ավելի վաղ մեղ հետ զրույցում նշել է «Գյումրին առանց տնակների» հիմնադրամի տնօրեն Գևորգ Գրիգորյանը։

Ի դեպ ՝նախատեսված է նաև նկարի ամբողջական վաճառք կամ աճուրդ, որից ստացված գումարը ևս ուղղվելու է բնակարանների գնմանը։