06.06.2026 | 18:07
19-ամյա Միրա Անդրեևան` «Ռոլան Գարոսի» հաղթող
Դավիթ Հարությունյանը՝ ժամը 1500 դոլարով «Հարավկովկասյան երկաթուղի» ՓԲԸ-ին խորհրդատվություն տալու մասին
Հասարակություն
17.10.2019 | 17:13
Նախկինում, այո՛, ծառայություններ մատուցել եմ, բայց մի քանի ամիս է` ինչ չեմ մատուցում: Factor.am-ի հարցին ի պատասխան ասաց արդարադատության նախկին նախարար, ՀՀԿ-ական Դավիթ Հարությունյանը՝ անդրադառնալով «Ժամանակ» օրաթերթի այն հրապարակմանը, որ ժամը 1500 դոլար վարձավճարով իրավաբանական խորհրդատվություն է մատուցում «Հարավկովկասյան երկաթուղիներ» ընկերությանը, որն այս պահին զբաղված է Հայաստանի հետ կոնցեսիոն պայմանագիրը լուծարելով:
«Թեև տեղեկությունները չեն համապատասխանում իրականությանը, բայց շնորհակալ եմ նման անվճար գովազդի համար»,- ասաց Դավիթ Հարությունյանը:
Հստակեցնող հարցին՝ մի քանի ամիս առաջ խորհրդատվություն տվե՞լ է ժամը 1500 դոլարով, նախկին պաշտանյան ասաց. «Արժեքը սխալ են նշել, իսկ իրականը արժեքը չեմ ցանկանում հրապարակել»:
Հիշեցնենք, որ դեռ այս տարվա հունվարին «Հարավկովկասյան երկաթուղի» ՓԲԸ իրավաբանական ծառայությունը Վարչական դատարան էր ներկայացրել հայցադիմում՝ պահանջելով վերացնել ընկերության նկատմամբ տուգանք սահմանելու մասին Տնտեսական մրցակցության պաշտպանության պետական հանձնաժողովի որոշումը:
Հավելենք, որ 2018 թվականի նոյեմբերի 20-ին հակամենաշնորհային պետական հանձնաժողովը որոշում էր կայացրել պատասխանատվության ենթարկել Հարավկովկասյան երկաթուղուն՝ «Տնտեսական մրցակցության պաշտպանության մասին» օրենքի դրույթները խախտելու համար: Մասնավորապես, հանձնաժողովը համարել էր, որ ընկերությունը չարաշահել է գերիշխող դիրքը և երկաթուղին տուգանվել էր 30 մլն դրամով:
Դատալեքսի փոխանցմամբ՝ օգոստոսի 30-ին, դատարանը ընկերության հայցը մերժել է: ՀԿԵ ՓԲԸ-ն հանդիսանում է «Ռուսական երկաթուղիներ» ԲԲԸ-ի դուստր ընկերություն և իրականացնում է Հայաստանի երկաթուղային համակարգի կոնցեսիոն կառավարումը:
Համաձայն 2008 թ. փետրվարի 13-ին Երևանում կնքված պայմանագրի՝ կոնցեսիոն կառավարման ժամկետը կազմում է 30 տարի՝ կողմերի փոխադարձ համաձայնությամբ ևս 10 տարի երկարացման իրավունքով:
Նարեկ Կիրակոսյան
