Հրայր Թովմասյանին վերջին անգամ հանդիպել եմ գարնանը․ Արամ Օրբելյան

Օրերս «Ժամանակ» օրաթերթը, հղում անելով սեփական աղբյուրներին, գրել էր, որ «Մարտի 1-ի գործով գլխավոր ամբաստանյալ Ռոբերտ Քոչարյանի փաստաբան Արամ Օրբելյանը մինչ դատավարության մեկնարկը և դրանից առաջ տասնյակ անգամներ այցելել է Սահմանադրական դատարան՝ Հրայր Թովմասյանի մոտ, սակայն ՍԴ-ում նրա ելումուտը ոչ մի տեղ չի արձանագրվել»։

Նշենք, որ Օրբելյանն ու Հրայր Թովմասյանն ունեն քավոր-սանիկական հարաբերություններ։

Անդրադառնալով այս հարցին՝ Factor.am-ի հետ զրույցում  Ռ․ Քոչարյանի պաշտպան Արամ Օրբելյանն  ասաց․

«Ես բավականին երկար ժամանակ է չեմ հանդիպել Հրայր Թովմասյանին, ոչ միայն ՍԴ-ում, այլ նաև ՍԴ-ից դուրս։ Այսինքն՝ հիմա, ցավոք սրտի, այնպես է ստացվել, որ եթե անգամ իմ անձնական հարցերով էլ հանդիպեմ, պիտի ասեն՝ հանդիպել ես։ Ես անգամ նրա ծննդյան օրվան ներկա չեմ գտնվել, երեխաս ծնվել է նա երեխայիս էլ չի տեսել, սա այն թեման է, որի համար քավոր-սանիկական հարաբերությունները կողքի ես դնում՝ պետության կայունության համար։ Ակնհայտորեն սուտ են այդ տեղեկությունները, վերջին անգամ Թովմասյանին հանդիպել եմ գարնանը»։

Ինչ վերաբերում է  ՍԴ իր ելումուտը չգրանցելուն,  Օրբելյանը հավաստիացրեց․ «Ես նախկինում երբ գնացել եմ, իմ ով լինելը ներս մտնելուց միշտ ներկայացրել եմ, Ոստիկանությանը ասել եմ՝ ում մոտ եմ բարձրանում, իմ այցելությունները միշտ եղել են բաց ու թափանցիկ, բայց դրանք եղել են շատ ավելի շուտ, և ո՛չ Քոչարյանի, ո՛չ ՍԴ-ում քննվող այլ գործ մենք չենք քննարկել»։

Լիլիթ Շաբոյան