16.12.2025 | 18:05
«Սա գրաքննություն չէ, այլ պետական պատվեր». Ժաննա Անդրեասյանը՝ «կոմկուսի շունչ» զգացողներին
Իսրայելում Հայոց ցեղասպանության զոհերի հիշատակի հուշարձան կբացվի. Ցինկեր
Քաղաքականություն
10.10.2019 | 19:49
Իսրայելում կարող է Հայոց ցեղասպանության զոհերի հուշարձան բացվել: Այսօր Երևանում լրագրողների հետ հանդիպմանն այս մասին ասել է «Իսրայել-Հայաստան» միջազգային հասարակական համաժողովի համանախագահ Ալեքսանդր Ցինկերը։
Հուշարձանը կարող է բացվել Փեթահ Տիկվա քաղաքում: Ցինկերի խոսքով՝ քաղաքային իշխանությունների կողմից անհրաժեշտ թույլտվությունն արդեն կա։
«Ներկայում դրամահավաք է սկսվել: Հուշարձնաը կստեղծվի Հայաստանում և կփոխադրվի Իսրայել: Հուշահամալիրի բացման հարցը կախված է նրանից, թե որքան արագ կհավաքվի անհրաժեշտ գումարը»,- ասել է Ալեքսանդր Ցինկերը:
Անդրադառնալով Իսրայելում Հայաստանի դեսպանատան բացմանը՝ բանախոսը նշել է, որ դիվանագիտական ներկայացուցչությունը կարող է բացվել 2020 թվականի գարնանից ոչ շուտ: Ըստ նրա՝ դա մեծ ջանքեր ու ծախսեր է պահանջում: Բայց դեսպանատան բացումը, ըստ Ցինկերի, կարող է Իսրայել Հայաստանի ղեկավարության այց կազմակերպելու լավ առիթ լինել, բայց դրա համար նույնպես նախապատրաստական աշխատանքներ են անհրաժեշտ՝ ԱԳՆ ղեկավարների հանդիպում, որոշակի համաձայնագրեր և փաստաթղթեր, որոնք կստորագրվեն այցի ընթացքում:
Փոխարենը Իսրայելը չի շտապում դեսպանատուն բացել Հայաստանում: Ալեքսանդր Ցինկերն ասում է՝ դրա համար պատճառներ կան:
«Նախ՝ դա ֆինանսական հարց է, դեսպանատան բացման և հետագա սպասարկման համար անհրաժեշտ են աշխատավարձեր և այլն: Երկրորդ՝ երկու երկրների միջև լուրջ առևտրատնտեսական հարաբերություններ են պետք, ինչը դեռևս չկա»,- նշել է նա:
Բացի այդ՝ Հայաստանում երբեք հրեական մեծ համայնք չի եղել, հիմա՝ առավել ևս, որոնց հարցերով դեսպանատունը կարող էր զբաղվել:
Ամեն դեպքում, Ալեքսանդր Ցինկերի խոսքով, դեսպանատան բացումն ու դեսպանների կարգավիճակի փոփոխությունը կբարձրացնի Հայաստանի և Իսրայելի միջև քաղաքական, այդ թվում՝ խորհրդարանական մակարդակով հարաբերությունների մակարդակը:
