15.12.2025 | 23:44
Ադրբեջանը պետք է դադարեցնի անձանց հսկողության MIRAS համակարգի ներդրումը. HRW
Սադախլոում կայանատեղին բացվել է՝ բեռնատարների անցումն ավելի արդյունավետ դարձնելու համար. Վրաստանում ՀՀ դեսպանատան խոսնակ
04.10.2019 | 15:27
Վրաստանում ՀՀ դեսպանատանը տեղյակ են հայ-վրացական սահմանի վրացական կողմում բեռնատարների համար նախատեսված նորաբաց կայանատեղիի հետ կապված խնդրի մասին: Factor.am-ի հետ զրույցում դեսպանատան մամուլի և հասարակայնության հետ կապերի վարչության պետ Հարութ Հայրապետյանն ասաց՝ վրաց գործընկերների հետ կապի մեջ են, քննարկում են ստեղծված իրավիճակը շտկելու հնարավորությունները:
Բեռնատարների մի քանի հայ վարորդները, հիշեցնենք, ահազանգել են, որ վրաց-հայկական սահմանին՝ վրացական Սադախլո գյուղում, նոր կայանատեղի է կառուցվել և վարորդներին հարկադրում են մեքենաները նախ կայանել այդտեղ՝ վճարելով 30 լարի: Նրանց պնդմամբ՝ բեռնատարների մեծ հերթեր են գոյացել, ոմանք մեկ օր է՝ չեն կարողանում առաջ շարժվել:
«Կայանատեղին պետությունն է բացել դա՝ ավելի հարմարավետ և արդյունավետ դարձնելու համար սահմանի անցումը, որպեսզի բեռնատարները ճանապարհին կանգնած չլինեն և չխոչընդոտեն թեթև մարդատար ավտոմեքենաների ընթացքը: Բացի այդ, ըստ վրացական կողմի, անվտանգության տեսանկյունից է արդարացված նման որոշման կայացումը, որպեսզի վարորդները փողոցում չլինեն, այլ ավելի հարմարավետ պայմաններում սպասեն սահմանն անցնելուն»,- նշեց Հարութ Հայրապետյանը:
Նա նշեց, որ սա եզակի դեպք չէ, մեծ ծանրաբեռնվածություն ունեցող անցակետերում նմանատիպ կայանատեղիներ կառուցվում են. «Նախորդ տարի էլ Լարսի անցակետում նման դեպք եղավ, երբ վարորդները բողոքում էին, բայց ժամանակը ցույց տվեց, որ անցակետն արդարացված է: Մեր տեղեկություններով՝ նաև վրաց-ադրբեջանական սահմանին կա նման անցակետ վրացական կողմից, որոնք կանոնակարգում են բեռնատարների ընթացքը»:
Հարութ Հայրապետյանը հույս հայտնեց, որ իրենց քննարկումների արդյունքում հնարավորինս արագ խնդիրը լուծում կստանա:
