«Մանվել Գրիգորյանի գործը մեկ բառով՝ իրավական բեսպրեդել է. նրա նկատմամբ կիրառվում է տոտալ խոշտանգում». Լևոն Բաղդասարյան

Մանվել Գրիգորյանի գործը մեկ բառով կարելի է բնութագրել որպես իրավական բեսպրեդել. այս մասին այսօր հրավիրված ասուլիսի ժամանակ ասաց Գրիգորյանի պաշտպան Լևոն Բաղդասարյանը:

Նրա խոսքով՝ ՀՀ ազգային ժողովի նախկին պատգամավոր, գեներալ-լեյտենանտ Մանվել Գրիգորյանի առողջական վիճակն ուսումնասիրող միջգերատեսչական հանձնաժողովն արձանագրել է, որ մեկ տարվա ընթացքում Գրիգորյանի առողջական վիճակում բացասական դինամիկա է գրանցվել, բայց մինչև հիմա հայտնի չէ հանձնաժողովի եզրակացությունը:

«Հանձնաժողովի որոշմամբ՝ Գրիգորյանին երկու օրով «Արմենիա» ԲԿ տեղափոխեցին, որպեսզի նրան հետազոտեն: Բժիշկներն արձանագրեցին, որ մեկ տարվա կտրվածքով նրա մոտ բացասական դինամիկա կա, ինչից հետո մինչ օրս անորոշ վիճակ է: Պարզ չէ, թե հանձնաժողովն ինչ եզրակացությունը կտա և երբ կտա այդ եզրակացությունը»,- ասաց նա:

Նրա խոսքով՝ Գրիգորյանի առողջական վիճակում ժամ ժամի  բացասական դինամիկա է ֆիքսվում, Գրիգորյանը արհեստական շնչառական սարքի օգնությամբ է շնչում, չի քայլում, քանի որ ոտքերը չի զգում:

Բաղդասարյանը նշեց, որ  բոլոր հիմքերը կան, որպեսզի Մանվել Գրիգորյանի խափանման միջոց կալանավորումը փոխվի, բայց  դատարանը իրենց միջնորդությունը չբավարարեց և իրենք՝ պաշտպանական կողմը, մի կողմ թողած իրավական գործառույթները, սկսել են ահազանգել, որ Գրիգորյանի կյանքին վտանգ է սպառնում:

«Գրիգորյանը, փաստորեն, ոչ թե կալանք է կրում, այլ պատիժ, իսկ նրա նկատմամբ կիրառվում է տոտալ խոշտանգում»,- ասաց  Լևոն Բաղդասարյանը:

Աղավնի Սուքիասյան