23.07.2026 | 22:53
Կոնֆերենցիաների լիգա. «Նոան» խուսափեց պարտությունից
ՔԿ-ն՝ ՊՆ-ի կողմից ռազմամթերքի խոշոր խմբաքանակը ձեռք բերելու նպատակով հայտարարված մրցույթի չեղարկման մասին
Հասարակություն
26.08.2019 | 17:08
Հայաստանում քրեական գործ է հարուցվել զենքի մատակարարման մրցույթի չեղարկման դեպքով, որին մասնակցել է ռուսական ընկերությունը։ Մրցույթի չեղարկումից հետո Պաշտպանության նախարարությունը դատական հայց է ներկայացրել ընկերությանը սև ցուցակում ընգրկելու պահանջով, իսկ ընկերության ներկայացուցիչը ներկայացրել է հաղորդում՝ հանցագործության մասին։
Factor.am-ին Քննչական կոմիտեից հայտնեցին, որ ՀՀ-ում գրանցված, ռեզիդենտ հանդիսացող «Օրսիս Արմս» ընկերության ներկայացուցիչ ՀՀ փաստաբանների պալատի փաստաբան Ալեքսանդր Սիրունյանը հաղորդում է ներկայացրել:
«Փաստաբան Ալեքսանդր Սիրունյանը Քննչական կոմիտե հաղորդում է ներկայացրել ՀՀ պաշտպանության նախարարության կողմից ռազմամթերքի խոշոր խմբաքանակ ձեռք բերելու նպատակով, փակ պարբերական մրցույթին մասնակցելու իրենց հայտը գնահատող հանձնաժողովի կողմից կեղծ պատճառաբանություններով մերժելու վերաբերյալ: ՀՀ քննչական կոմիտեի զինվորական քննչական գլխավոր վարչության ՀԿԳ քննության վարչությունում նշված հաղորդման հիման վրա նախապատրաստված նյութերով 17.08.2019թ. ՀՀ քրեական օրենսգրքի 376-րդ հոդվածի 1-ին մասով նախատեսված հանցագործության հատկանիշներով հարուցվել է քրեական գործ: Քրեական գործով նախաքննությունը շարունակվում է»,- մեզ հետ զրույցում ասաց ՔԿ դեպարտամենտի տեղեկատվության և հասարակայնության հետ կապերի բաժնի պետ Նաիրա Հարությունյանը։
Նշենք, որ ավելի վաղ մեզ հետ զրույցում ուսական ORSIS ընկերության ներկայացուցիչը՝ մեկնաբանելով մի քանի միլիոն դոլար արժողությամբ զինտեխնիկայի մատակարարման մրցույթը չեղարկելու մասին տեղեկությունը, նշել էր. «Մեզ համար հասկանալի չէ, թե ինչի հետ է կապված զենքի մատակարարման մրցույթը չեղարկելու վերաբերյալ Հայաստանի պաշտպանության նախարարության որոշումը կամ ինչն է ազդել դրա վրա։ Մեզ համար դժվար է հիմա մեկնաբանել հետագա քայլերը: Քրեական գործ է հարուցվել, քննություն կլինի: Կցանկանայինք սպասել քննության ավարտին»։
Աղավնի Սուքիասյան
