Քաղաքականություն
08.08.2019 | 13:20Անվտանգության խորհրդի քարտուղար Արմեն Գրիգորյանը կարծում է, որ Քննչական մարմինների գործառույթն է՝ պարզել, թե ինչպես են Մարտի 1-ի քրեական գործի վերաբերյալ գաղտնի փաստաթղթերը, նյութերը հայտնվել BBC-ի տրամադրության տակ: Այս մասին նա ասաց Կառավարության նիստից հետո լրագրողների հետ ճեպազրույցում։
Հարցին՝ անվտանգությանը սպառնալիք չէ՞, երբ շատ կարևոր փաստաթղթեր հայտնվում են այլ անձանց տրամադրության տակ, Գրիգորյանը պատասխանեց, որ աշխարհում չկա մի երկիր, որտեղ լուծված է փաստաթղթերը գաղտնի պահելու հարցը, և դրա ապացույցը WikiLeaks-ն է։
«Գաղտնիության հարցի հետ առնչվում են բոլորը։ «WikiLeaks-ը դրա վառ օրինակն է, նույնիսկ աշխարհի ամենահզոր երկրներից մեկի՝ ԱՄՆ-ի ամբողջ գաղտնի փաստաթղթերը հայտնվել էին լրատվամիջոցների ուշադրության կենտրոնում», – ասաց Գրիգորյանը։
Նրա խոսքով՝ կատարվածը մտահոգիչ է ոչ միայն իր համար, այլև անվտանգության համար ցանկացած պատասխանատուի։ «Մեզ համար շատ կարևոր է, որ գաղտնի ինֆորմացիայի որևէ արտահոսք չլինի, որովհետև գաղտնիությունը նշանակում է նաև ապահովվածություն, անվտանգություն»,- հավելեց Գրիգորյանը։
Հիշեցնենք, որ BBC-ի ռուսական ծառայությունը երեկ հոդված էր հրապարակել, որի համաձայն՝ Մարտի 1-ին կրակելու հրամանը տվել է Արցախի գեներալ Սամվել Կարապետյանը (Օգանովսկի), իսկ Գագիկ Ծառուկյանը և Սամվել Ալեքսանյանը ֆինանսավորել են գաղտնի շտաբը:
Մանրամասները՝ տեսանյութում:
Նարեկ Կիրակոսյան
