Վանաձորի Հայքի հրապարակում կտեղադրվեն գերժամանակակից շատրվաններ

Մի քանի օրից Վանաձորի Հայքի հրապարակում կսկսվեն շինարարական աշխատանքներ: Համայնքային ենթակառուցվածքների զարգացմանն ուղղված պետական ծրագրի շրջանակներում, սուբվենցիաներ ստանալու համար ծրագրային հայտերի գնահատման միջգերատեսչական հանձնաժողովը քննարկել և հավանության է արժանացրել Վանաձոր համայնքի «Հայքի հրապարակի բարեկարգման և վերանորոգման» ծրագիրը:

Աշխատանքներն իրականացվում են ՀՀ կառավարության սուբվենցիոն ծրագրով՝ Վանաձորի համայնքապետարանի հետ համաֆինանսավորմամբ: Հրապարակը նոր տեսքի բերելու համար հատկացվել է 245,7 մլն դրամ. «Հիմնական շեշտը դրված է ջրավազանների և շատրվանների արդիականացման վրա, այսինքն՝ նոր շատրվանների կառուցմանը: Մինչև այդ կիրականացվի նաև ջրավազանի հիդրոմեկուսացում, որպեսզի հետագայում ջրի բացթողումների խնդիր չունենանք: Ամբողջությամբ կփոխվեն բոլոր ինժեներական ենթակառուցվածքները՝ ջրահեռացման, ջրամատակարարման, էլեկտրամատակարարման: Եվ կտեղադրվեն ամենավերջին թողարկման շատրվաններ: Կունենանք՝ ձայնային, լուսային ու լազերային էֆեկտներով շատրվաններ: Շահող կազմակերպության ներկայացուցիչն ասաց, որ նաև կլինի կրակային շոու: Մի խոսքով, գերժամանակակից, և իրենց ասելով՝ տարածաշրջանում նմանը չունեցող շատրվաններ կունենանք»,- ասաց Վանաձորի գլխավոր ճարտարապետ Սուրեն Աբովյանը:

Շատրվանների արդիականացմանը զուգահեռ, նախատեսվում է նաև, որ կնորոգվեն հրապարակի բազալտե անցուղիները:  Կբարեկարգվեն նաև հրապարակում գտնվող Տիգրան Մեծի 41 և Խորենացի 10 շենքերին հարակից մայթերը, կտեղադրվի ամբողջությամբ նոր պուրակային լուսավորություն, ինչպես նաև կլինի հրապարակում գտնվող 5 շենքերի ճարտարապետական դեկորատիվ լուսավորություն: Այս ամենի արդյունքում նախատեսվում է, որ Վանաձորը կունենա նոր տեսքով ու նոր շնչով հրապարակ, պահպանելով նաև հրապարակի քաղաքաշինական արժեքը: Հրապարակը վերջին անգամ հիմնանորոգվել է 1984-85 թվականներին:

Լսելով հրապարակի հիմնանորոգման մասին, բնակիչներն անընդհատ սոցցանցերում քննարկում են Գուգարք հյուրանոցին կից շինության լինել-չլինելու հարցը:  Մեր այն հարցին, թե ինչ ճակատագիր է սպասվում նշված շինությանը, Աբովյանը պատասխանեց. «Որպես ճարտարապետ կարծում եմ, որ քաղաքաշինական առումով կգա ժամանակ, որ դրանք չեն լինի, բայց դա շատ բարդ իրավական պրոցես է: Մետաղական ծածկարանի մասով մենք հիմա սեփականատիրոջ հետ ունենք դատական վեճ, և ըստ դատարանի վճռի՝ կորոշվի դրա ճակատագիրը: Իսկ քարե շինության մասով կան օրինական փաստաթղթեր»:

Հրապարակի հիմնանորոգման աշխատանքներն իրականացելու մրցույթը շահել են՝ «Վանտեխմատ» և«Պրիզմավան» ՍՊԸ-ները: Նախատեսվում է, որ աշխատանքների ավարտը կլինի 4 ամսից, սակայն մրցույթը շահած կազմակերպությունները խոստացել են, որ հոկտեմբերին՝ իր ծննդյան օրը, Վանաձորը կունենա բոլորովին նոր հրապարակ:

Տաթևիկ Ղազարյան