Վկայի կարգավիճակ ունեցող ՀՀ քաղաքացին չի կարող լքել Վրաստանը. ինչո՞ւ վրաց իրավապահները չեն վերադարձնում նրա անձնագիրը. ՏԵՍԱՆՅՈՒԹ

Թմրանյութ տեղափոխելու կասկածանքով Վրաստանում ձերբակալված ուղևորատար ավտոբուսի հայ վարորդին՝ Արտյոմ Խաչատրյանին ազատ են արձակել, սակայն նա դեռևս Հայաստան վերադառնալ չի կարողանում: Եղբայրը՝ Ջոն Խաչատրյանը Factor.am-ի հետ զրույցում ասաց՝ քննչական մարմիններն ազատ արձակվելուց հետո անձնագիրը չեն վերադարձնում:

Նշենք, որ Արտյոմ Խաչատրյանը Մոսկվա-Երևան երթուղու ավտոբուսի վարորդն է, որը հունիսի 24-ի առավոտյան ժամը 06։00-ին ռուս-վրացական Վերին Լարսի անցակետի վրացական հատվածում կանգնեցրել էին՝ արգելված բեռ տեղափոխելու համար: Որոշ ժամանակ անց հաջողվել է կազմակերպել ուղևորների Հայաստան տեղափոխումը, իսկ վարորդները ձերբակալվել են: Ավտոբուսում թմրանյութ են հայտնաբերել՝ շուրջ 500 գրամ հերոին:

Ջոն Խաչատրյանը պատմեց, որ երկու տղամարդ՝ ազգությամբ հայեր, գնացել են հայկական ուղևորափոխադրող ընկերության Մոսկվայի գրասենյակ: Նրանցից մեկը «հովերբորդ» է փոխանցել, վճարել՝ Հայաստան փոխադրելու համար, իսկ մյուսն ավտոբուսի տոմս է գնել: Ինչպես հաճախ է պատահում՝ ընկերության ներկայացուցիչները վարորդին հանձնարարել են ուղևորներից մեկին խնդրել՝ իր իրերի հետ Հայաստան հասցնել այն:

«Երբ հասել են սահման, կանգնեցրել են մեքենան, ստուգել են, էդ հովերբորդի մեջից հանել են հերոինը: Ախպերս էլ ասել է, որ ինքն է տվել ուղևորին: Ախպորս ձերբակալել են: Հետո, որ կարողացանք վիդեոներով, ֆոտոներով ապացուցել, որ իմ ախպերը կապ չունի, բերել են, օֆիսով ա եկել, իմ ախպորը թողել են»,- պատմեց Ջոն Խաչատրյանը:

Արտյոմ Խաչատրյանին և ավտոբուսի մյուս վարորդին, ձերբակալության համար սահմանված ժամկետը լրանալուց հետո, ազատ են արձակել: Սակայն վրաց քննչական մարմինները չեն վերադարձրել անձնագրերը, թեև նրանք վկայի կարգավիճակ ունեն: Ջոն Խաչատրյանն ասում է՝ վրացական կողմից անձնագրերը չվերադարձնելը որևէ կերպ չեն պարզաբանում:

«Վրացական կողմն ասում ա՝ գործը ընթացքի մեջ ա, դատախազին զանգում են՝ չեն կարողանում բռնացնել: Իմ ախպերն էլ գրել ա, որ չեմ խուսափում քննությունից, գրել ա, որ երբ ինձ կանչեք, կարող եմ գամ: Հիմա ես, ուրիշ երկրի քաղաքացի, անտեր մնացել եմ ստեղ»,- ասաց Արտյոմ Խաչատրյանի եղբայրը:

Այս գործով նաև կալանավորված անձ կա: Վրաստանում ՀՀ դեսպանության տեղեկատվության և հասարակայնության հետ կապերի վարչության պետ Հարություն Հայրապետյանը մեզ հետ զրույցում հայտնեց, որ կալանավորված անձը նույնպես ՀՀ քաղաքացի է, եղել է Մոսկվայից ժամանած նույն ավտոբուսում՝ այսպես ասած, բեռն «ուղեկցելու»:

«Սահմանային անցակետում, երբ արդեն կասկածել են, մի քանի անգամ փորձել են այդ հովերբորդը, որի մեջ եղել է թմրանյութը, անցկացնել սարքի միջով, այդ ուղևորն ակտիվություն է ցուցաբերել, որից հետո արդեն իրավապահների մոտ կասկած է առաջացել, որ ինքն է այդ ամեն ինչի հետ կապված անձը»,- նշեց Հայրապետյանը:

Հարություն Հայրապետյանը նշեց, որ վարորդների գործով զբաղվող փաստաբանին մասնագիտական օգնություն է ցուցաբերում նաև դեսպանատան իրավաբանը: Իրենք էլ մշտական կապի մեջ են ՀՀ քաղաքացի վարորդների հետ:  Հայկական դիվանագիտական ներկայացուցչությունը նաև աշխատում է վրացական պատկան մարմինների հետ:

«Դեսպանության անունից բողոք էր ուղղվել Դատախազություն, որպեսզի նրանց անձնագրերը հետ վերադարձնեն փաստաբանի միջոցով: Այդ բողոքը նույնությամբ, նաև կցելով դեսպանության կարծիքը, ուղարկել ենք նաև Վրաստանի ԱԳՆ, որպեսզի ամեն ինչ անեն, որպեսզի նրանց անձնագրերը հետ վերադարձվեն»,- ասաց նա:

Վրաստանում Հայաստանի դեսպանատան ներկայացուցչի  խոսքով՝ իրենց պատասխանել են, որ արդեն զբաղվում են գործով, կփորձեն դրական լուծում տալ. «Նախադեպն այնպիսին է, որ քանի որ գործով որպես վկա են անցնում, մեծ է հավանականությունը, որ բողոքի դեպքում հետ կվերադարձվի: Թե՛ փաստաբանի մոտ, թե՛ մեզ մոտ հույսը մեծ է, որ շուտով կվերադարձվեն»:

Նշենք, որ թմրանյութի մաքսանենգության համար, Վրաստանի օրենսդրությամբ, 6-9 տարի ժամկետով ազատազրկում է նախատեսվում:

Թամարա Հակոբյան