Լոռու մարզում կարկուտի հասցրած վնասի չափը հաշվարկել են. մինչ այդ՝ գյուղացիները փորձում են սածիլները վերականգնել

Հունիսի առաջին երկու շաբաթների ընթացքում Լոռու մարզում տեղացած կարկուտն ու սելավները մեծ վնաս են հասցրել մարզի մի շարք համայնքներին: Տուժել են, մասնավորապես, Մեծ Պարնի, Հարթագյուղ և Ջրաշեն համայնքները: Այս համայնքներում վնասի չափերը հաշվարկվել են, համապատասխան ակտեր են կազմվել:

«Երեք համայնքներում միասին վնասվել են շուրջ 55 հա հացահատիկային մշակաբույսեր, 41 հա կերային մշակաբույսեր և 26 հա բանջարաբոստանային կուլտուրաներ: Ակտերը կազմվել են, ամենաուշը վաղը մենք կուղարկենք հանրապետական հանձնաժողովին, իրենք կքննարկեն և կուղարկեն գյուղատնտեսության նախարարություն: Գումարային հաշվարկներն այնտեղ են կատարում: Կարող են մարդիկ բույսը նորից դնել, բայց վեգետացիա տեղի չունենա: Հացահատիկի մասին խոսք լինել ընդհանրապես չի կարող, որ նորից ցանեն, արդեն շատ ուշ է: Բայց բանջարաբոստանային կուլտուրաները, օրինակ՝ կաղամբի սածիլները, մարդիկ փորձում են վերականգնել, ինչպես ասում են՝ սրտի մխիթարանք է, նորից դնում են, տեսնեն՝ ինչ կլինի: Հնարավոր է, որ ինչ-որ բան լինի, դա կախված է եղանակային պայմաններից»,- ասաց  Լոռու մարզպետարանի գյուղատնտեսության և բնապահպանության վարչության պետի ժամանակավոր պաշտոնակատար Արտյոմ Շահվերդյանը:

Երեք համայնքներում շուրջ 468 տնտեսություն է վնասներ կրել: Իսկ մարզի Շահումյան և Ջրաշեն համայքներում, բացի այն, որ վնասվել են ցանքատարածություններ, սելավները լցվել են նաև բնակելի տներ, անասնագոմեր, վնասել միջհամայնքային ճանապարհները:

Կարկուտից տուժել են նաև Ագարակ, Լեջան, Կողես, Յաղդան և Սարալանջ  համայնքները, բայց այստեղ ակտեր չեն կազմվել, քանի որ, ըստ համայնքային հանձնաժողովի, այս տարածքներում պատճառված վնասի չափը փոքր է եղել:

Մայիսին կարկուտից տուժել է նաև Աքորի համայնքը, ակտը կազմվել է, ուղարկվել համապատասխան մարմիններին, սակայն որևէ պատասխան դեռևս չեն ստացել: «Մենք, ինչպես որ կարգն է, շարժվում ենք, բայց չենք կարող ասել՝ փոխհատուցում կլինի՞, թե՞ ոչ: Նախորդ տարի մի քանի համայնքների մասնակի փոխհատուցում եղել է»,- տեղեկացրեց Շահվերդյանը:

Տաթևիկ Ղազարյան