Գյումրու քրեական պատմություններով հայտնի դպրոցները ունեն նոր տնօրեններ

Աղմկոտ ու քրեական պատմություններով հայտնի Գյումրու թիվ 37 և 27 դպրոցները նոր տնօրեններ ունեն: Մասնավորապես, թիվ 37 դպրոցի տնօրենի պաշտոնը թափուր էր մնացել, երբ ապրիլին նախկին տնօրեն Աստղիկ Ավետիսյանն ազատման դիմում  էր գրել: 2018թ. Աստղիկ Ավետիսյանի նկատմամբ հարուցվել է քրեական գործ՝ թույլ տրված առերևույթ չարաշահումների դեպքով, 2017թ-ին էլ «Իրազեկ քաղաքացիների միավորումը» տարբեր դպրոցների ու մանկապարտեզների տնօրենների թվում ձայնագրել էր նաև Աստղիկ Ավետիսյանին, որում նա պատմում էր ընտրություններում ՀՀԿ-ին աջակցելու մասին։ Ձայնագրությունների առիթով քրեական գործ այդպես էլ չէր հարուցվել:

Հունիսի 10-ին տեղի է ունեցել 37 դպրոցի տնօրենի նոր ընտրությունը։ Հավակնորդները երկուսն էին՝ Գյումրիի թիվ 42 դպրոցի նախկին տնօրեն Լիաննա Մադոյանն ու թիվ 29 հիմնական դպրոցի ֆիզկուլտուրայի նախկին ուսուցիչ Հովհաննես Մելքոնյանը։ Այս մասին Factor.am-ի հետ զրույցում տեղեկացրեց դպրոցի կառավարման խորհրդի նախագահ Հռիփսիմե Հարությունյանը: Տնօրենի ընտրությունը նորմալ է անցել, առանց բողոքների ու խախտումների։

«Կառավարման խորհրդի բոլոր 8 անդամները ներկա էին, ընտրությունն իր հունով անցել է, նախարարության կողմից ներկայացուցիչ ևս եղել է: Փակ գաղտնի քվեարկությամբ 6 կողմ ձայնով տնօրեն է ընտրվել Հովհաննես Մելքոնյանը, 2-ն էլ քվեարկել են բոլորին դեմ: Երկու թեկնածուներն էլ շատ լավ ներկայացրեցին իրենց զարգացման ծրագիրը, հարցադրումներ արեցինք, պատասխանեցին մեր հարցադրումներին, արդյունքում ընտրվեց Հովհաննես Մելքոնյանը»,- ասաց Հռիփսիմե Հարությունյանը։

Իսկ թիվ 27 դպրոցի տնօրենի ընտրությունը տեղի է ունեցել հունիսի 11-ին: Դպրոցի նախկին տնօրեն Կարին Լալազարյանը մարտի 27-ին ձերբակալվել էր՝ առանձնապես խոշոր չափերով կաշառք ստանալու, պաշտոնական լիազորություններն անցնելու կասկածանքով:

Գյումրիի թիվ 27 դպրոցի տնօրենի մրցույթին մասնակցել է 3 թեկնածու՝ Առափի գյուղի դպրոցի ռուսաց լեզվի ուսուցչուհի Սուսաննա Ստեփանյանը, Հայկավան դպրոցի տնօրեն Կարեն Գալստյանը, ինչպես նաև Ռոզա Գևորգյանը: Մրցույթն անցկացվել է երկու փուլով, քանի որ թեկնածուներից ոչ մեկն անհրաժեշտ թվով ձայներ չի ստացել։ Այս մասին Factor.am-ին տեղեկացրեց թիվ 27դպրոցի կառավարման խորհրդի նախագահ, Շիրակի մարզպետի օգնական Անի Մաղաքյանը։

«Առաջին փուլում հավակնորդներից որևէ մեկը 5 կողմ ձայն չի հավաքել, որը, ըստ սահմանված կարգի, անհրաժեշտ էր մրցույթում հաղթող ճանաչվելու համար։ Անցկացվել է կրկնակի քվեարկություն: Երկրորդ փուլ անցել են առավելագույն կողմ ձայներ հավաքած երկու թեկնածուներ Կարեն Գալստյանն ու Ռոզա Գևորգյանը: Երկրորդ փուլ անցել են Ռոզա Գևորգյանը և Կարեն Գալստյանը: Երկրորդ փուլում Կարեն Գալստյանը ստացել է 5 կողմ, Ռոզա Գևորգյանը՝ 1 ձայն, 1 քվեաթերթիկ բոլորին դեմ նշումով է եղել: Արդյունքում մրցույթի հաղթող է ճանաչվել Կարեն Գալստյանը»,- ասաց Անի Մաղաքյանը։

Մրցույթում հաղթող ճանաչված տնօրենների նշանակումը կատարելու է Շիրակի մարզպետ Տիգրան Պետրոսյանը:

Էմմա Չոբանյան