10.10.2026 | 19:12
Ֆուտբոլի Հայաստանի հավաքականը հոկտեմբերի 14-17-ը մարզական հավաք կանցկացնի. Մ-17
Հայ-իտալական բիզնես համաժողովի երկրորդ աշխատանքային օրը Գյումրիում էր
Տնտեսություն
11.06.2019 | 20:59
Այսօր Գյումրիում էր Հայաստանում Իտալիայի դեսպան Վինչենցո Դել Մոնակոյի գլխավորած պատվիրակությունը՝ մասնակցելու հայ-իտալական բիզնես համաժողովին։
Ֆորումի մասնակիցներին ընդունել են Գյումրիի քաղաքապետն ու Շիրակի մարզպետը։ Իտալացիներն էլ Գյումրի էին եկել մեծ պատվիրակությամբ ու տնտեսական ներդրումների պատրաստակամությամբ։
«Երբ ասում են`գնում ենք Գյումրի, տեսնում ենք Գյումրին, նշանակում է` տեսնում ենք նաև ամբողջ Հայաստանը: Մենք Գյումրի գալիս ենք հաճույքով, և Գյումրի գալու մեր նպատակները ոչ միայն մշակութային և քաղաքական են, այլ նաև տնտեսական նկատառումներ ունենք, ծրագրեր ունենք այստեղ»,-ասել է Իտալիայի դեսպանը։
Տնտեսական համագործակցության ու ծրագրերի մասին խոսել է նաև Շիրակի մարզպետ Տիգրան Պետրոսյանը։
«Մեր քաղաքը մեծ ներուժ ունեցող քաղաք է, այստեղ տուրիզմի, քաղաքաշինության, ճարտարապետության, առաջատար տեխնոլոգիաների բնագավառներում մենք, իրապես, ասելիք ուեննք, ուրախ կլինենք համագործակցելու»,- ասել է Շիրակի մարզպետը։
Գյումրիի քաղաքապետ Սամվել Բալասանյանն էլ նշել է, որ պատրաստակամ են աջակցելու և ծրագրերը կյանքի կոչելու։
«Վստահաբար ասենք, որ մենք՝ մարզային ու քաղաքային իշխանություններս, պատրաստակամ ենք կանգնել ձեր կողքին, եթե մեր մարզում և քաղաքում ծրագրեր կունենաք իրականացնելու»,- ասել է Սամվել Բալասանյանը։
Նշենք, որ հունիսի 10-ին առաջին անգամ Երևանում անցկացվեց հայ-իտալական բիզնես համաժողով, որի աշխատանքային երկրորդ օրը անցկացվեց Գյումրիում։
Հայ-իտալական բիզնես համաժողովը նվիրված էր տրանսպորտի, էներգետիկայի, միջավայրի, շինարարության, խելացի քաղաքների և վերականգնման ոլորտների ենթակառուցվածքներին, որին մասնակցում էին նշված բնագավառների տեղական հաստատությունների, իտալական ասոցիացիաների և Simest-ի ընկերության ներկայացուցիչներ:
Բիզնես համաժողովից հետո հյուրերը մարզպետ Տիգրան Պետրոսյանի ուղեկցությամբ շրջել են քաղաքում՝ ծանոթանալով Գյումրիի ճարտարապետությանը։
Էմմա Չոբանյան
