Շոգին դիմակայելու խորհուրդներ՝ մասնագետներից

ՀՀ առողջապահության նախարարության Հիվանդությունների վերահսկման և կանխարգելման ազգային կենտրոնի գլխավոր տնօրենի տեղակալ Նունե Բակունցն այսօր հրավիրված մամուլի ասուլիսի ժամանակ խոսեց ամռանը շոգ եղանակին ուլտրամանուշակագույն ճառագայթման բացասական ազդեցությունը մեղմելու եղանակների մասին՝ նշելով, որ այդ նպատակով նախ անհրաժեշտ է խուսափել արևի ուղիղ ճառագայթներից:

«Ամեն դեպքում, եթե նույնիսկ անհրաժեշտություն է առաջացել օրվա շոգ ժամին գտնվել դրսում, խորհուրդ է տրվում կրել գլխարկ կամ ունենալ հովանոց: Դրանից բացի, պարտադիր պետք է կրել արևապաշտպան ակնոց և պաշտպանել մաշկը համապատասխան քսուքներով: Ինչպես ամեն անգամ օդի ջերմաստիճանի բարձրացման շրջանում ընդգծում ենք, այս անգամ ևս հորդորում ենք խմել ջուր: Շատ կարևոր է սովորական ջուրը, ոչ թե հյութերը և գազավորված ըմպելիքները: Շոգ եղանակի ժամանակ շատ ջուր ենք կորցնում, հետևաբար պետք է այդ կորցրածը լրացնել: Այս տեսանկյունից լավագույն ըմպելիքը, թերևս, հայկական ավանդական թանն է»,-ասաց Բակունցը:

Նրա խոսքով՝ շոգ օրերին ոչ պակաս կարևոր է սննդակարգի վերանայումը և առավել շոգ ժամերին նախընտրելի է ընդունել առավել թեթև սնունդ, որ մարսողության տեսանկյունից ծանր չլինի օրգանիզմի համար:

«Ամռանն աղիքային վարակների հավանականությունը մեծանում է, հետևաբար հորդորում ենք խստագույնս պահպանել հիգիենայի կանոնները: Ինչպես նաև ուտելուց առաջ լավ լվանալ միրգն ու բանջարեղենը»,-նշեց նա։

ՀՀ առողջապահության նախարարության Հիվանդությունների վերահսկման և կանխարգելման ազգային կենտրոնի գլխավոր տնօրենի տեղակալը խորհուրդներ տվեց նաև հղիներին, երեխաներին, տարեցներին, խրոնիկ հիվանդներին՝ որպես կարևոր միջոց կարևորելով ֆիզիկական ակտիվությունը:

Ասուլիսին ներկա Երևանի գլխավոր սրտաբան Պարունակ Զելվեյանն էլ կարևորեց ամռան շոգ եղանակին խրոնիկ հիվանդների կապը բժիշկների հետ։

«Խրոնիկ հիվանդները պետք է բժիշկների հետ քննարկեն, թե հեղուկների ծավալն ինչ քանակով  է անհրաժեշտ ընդունել։ Ամռանը ջերմաստիճանի բարձրացմամբ պայմանավորված զարկերակային ճնշումն իջնում է, հետևաբար ճիշտ կլինի բժշկի հետ քննարկել, գուցե անհրաժեշտություն կա դեղաչափի նվազման»,-ասաց Զելվեյանը: