Գյումրիում առաջին սմարթ կանգառն է տեղադրվել

Գյումրիի Սուրբ Ամենափրկիչ եկեղեցու մոտակայքում քաղաքի առաջին սմարթ կանգառն է տեղադրվել, որը վերջնական տեսքի կբերվի և շահագործման կհանձնվի շուրջ մեկ շաբաթից։ Այս մասին Factor.am-ի հետ զրույցում տեղեկացրեց Գյումրու քաղաքապետարանի տրանսպորտի բաժնի պետ Արտյոմ Սարգսյանը։

Նա նշեց, որ մտահղացման հեղինակը մոսկվաբնակ գյումրեցի գործարար Նորայր Դավթյանն է:

«Տեղադրողը Մոսկվայից եկած գյումրեցի գործարար Նորայր Դավթյանն է, ինքն է առաջարկել Գյումրիի քաղաքապետին, ինքն է ամբողջ գումարը ներդնում։ Այս պահին էլ ընթանում են չափագրման աշխատանքները, որովհետև, ըստ օրենքով սահմանված կարգի, յուրաքանչյուր կանգառի հողակտորն ինքը վարձակալությամբ վերցնում է քաղաքապետարանից: Տրվելու է նաև համապատասխան վկայական, որի  հիման վրա տեղադրվելու են մյուս կանգառները»,- ասաց Արտյոմ Սարգսյանը:

Նրա տեղեկացմամբ՝ 3 տարվա ընթացքում տեղադրվելու է մոտ 100 կանգառ. «35 կանգառ տեղադրվելու է այս տարի, 25-ը՝ հաջորդ տարի, մոտավորապես 25-30 կանգառ էլ կտեղադրվի 2021 թվականին»:

Ընդհանուր առմամբ՝ Գյումրիին անհրաժեշտ է 140-150 կանգառ, բայց դեռ պարզ չէ՝ արդյո՞ք երիտասարդ գործարարը ֆինանսական միջոցներ կհատկացնի բոլոր կանգառների համար: Մեկ սմարթ կանգառի արժեքը 2.000-3.000 դոլար է։

«3 տարվա ընթացքում բոլոր կանգառները կապամոնտաժվեն, նորերը կտեղադրվեն, իսկ թե հետագայում Նորայրը ծրագիրը կշարունակի, չի շարունակի, արդեն պարզ կլինի հետագա գործընթացից, քանի որ նա սա որպես բիզնես է դիտարկում»,- ասաց Արտյոմ Սարգսյանը:

Սմարթ կանգառներում կտեղադրվեն արևային պանելներ, որից դրանք էլեկտրաէներգիայի սնուցում կստանան: Կանգառներում նաև բջջային հեռախոս լիցքավորելու և Wi-Fi-ից օգտվելու հնարավորություն կլինի:

Էմմա Չոբանյան