Մենք, առհասարակ, վտանգ ենք զգում բոլոր նրանցից, ովքեր պատրաստ են հողեր հանձնել. Դավիթ Բաբայան

Factor.am-ի հարցազրույցը Արցախի նախագահի խորհրդական Դավիթ Բաբայանի հետ

– Վարչապետ Նիկոլ Փաշինյանն ասաց՝ ԱԺ քննիչ հանձնաժողով է ստեղծվելու ապրիլյան պատերազմի պատճառներն ուսումնասիրելու համար: Արցախում նման անհրաժեշտություն տեսնո՞ւմ են:

– Գիտեք՝ ապրիլյան պատերազմը մի կարևոր փուլ է եղել մեր պետականաշինության, պատմության մեջ: Ադրբեջանը նպատակ ուներ ոչնչացնել: Եթե ստեղծվելու է հանձնաժողով՝ պատճառներն ուսումնասիրելու համար, դա այնքան կարևոր է: Այո՛, ինչու չէ, թող ուսումնասիրվի, կարծում եմ՝ սա չի սահմանափակվելու լոկ Ազգային ժողովով, պետք է ներգրավվեն գիտնականներ, ռազմական փորձագետներ:

– Ըստ Ձեզ՝ ի՞նչ բացահայտումներ կարող են լինել: Հնարավո՞ր է՝ Արցախի, Հայաստանի որոշ պաշտոնյաներ մեղավորություն ունեն, որի մասին մինչ այժմ հայտնի չէ հանրությանը:

– Չեմ կարող ասել, թե ինչ կբացահայտվի, բայց միայն այս տեսանկյունից չպետք է նայենք հարցին, համապարփակ ձևով պետք է ուսումնասիրվի: Այս պահին չեմ կարող ասել՝ ինչ բացահայտումներ կլինեն:

– Վարչապետն ասաց՝ որոշ ուժերի կողմից տեսնում է դավադիր պատերազմ հրահրելու, անգամ որոշ տարածքներ հանձնելու և տեղի ունեցածի պատասխանատվությունը Հայաստանի Կառավարության վրա դնելու հեռահար նպատակ: Ի՞նչ նկատի ուներ, Ձեզ համար հասկանալի՞ էր:

– Միշտ ասել ենք՝ ամենամեծ ձեռքբերումը մեր միասնականությունն է, եթե այդ միասնականությունը խարխլվի, կխարխլվեն հայոց պետականության հիմքերը:

– Կա՞ նման վտանգ:

– Միշտ էլ նման վտանգ կա: Եթե Հախվերդյանը մեզ թուրք է համարում, դա ինչ է՝ չի՞ խարխլում: Հայության պատմության մեջ բոլոր պարտությունները եղել են միասնական չլինելու շնորհիվ: Եվ դավադրությունները եղել են հենց մեր շրջանակից։

– Այսինքն՝ «տարածքներ հանձնելու» մասին վարչապետի հայտարարությունն անհանգստացնո՞ղ է:

– Մենք, առհասարակ, վտանգ ենք զգում բոլոր նրանցից, ովքեր պատրաստ են հողեր հանձնել։ Կապ չունի՝ այդ մարդն ով է, Արցախո՞ւմ է, թե՞ Հայաստանում։

– Ինչո՞ւ վերջին շրջանում Հայաստանի և Արցախի որոշ պաշտոնյաների միջև հարաբերությունները սրվեցին, և արդյո՞ք պատճառը չդարձավ Բակո Սահակյանի և Արկադի Ղուկասյանի անձնական երաշխավորությունը՝ Քոչարյանի ազատության համար:

– Ի՞նչ պաշտոնյաների: Արցախի երկու նախագահների անձնական նախաձեռնությունն է եղել, մարդասիրական քայլ, նրանք հանդես չեն եկել որպես Արցախի Հանրապետություն: Այո՛, մենք երկու միասնական հայրենիք ենք, բայց երկու պետական համակարգեր են, և խառնվել մեկը մյուսի գործերին՝ ճիշտ չէ, դա բերելու է վատ հետևանքների:

Շողիկ Գալստյան