15.05.2026 | 23:20
Հուլիսի 1-ից Երևան-Բուխարեստ նոր ուղիղ չվերթ կմեկնարկի
Վանաձորում Yandex տաքսի ծառայության աշխատակիցները հրաժարվում են աշխատել
Տնտեսություն
15.05.2019 | 20:56
Այսօր Yandex տաքսի ծառայության վանաձորցի վարորդները բողոքի ակցիա էին կազմակերպել:
Ներկայումս Վանաձորում ծառայության մինիմալ գումարը կազմում է 200 դրամ:
Հավաքված ակցիայի մասնակիցները պահանջում էին, որպեսզի գումարը բարձրանա գոնե 100 դրամով.
«Մեր ակցիայի նպատակն այն է, որ մենք չենք ուզում 200 դրամի համար մեր մեքենաները կոտրենք, գոնե 100 դրամով բարձրացնեն: Եթե չեն անում, գոնե 1 կմ-ից հետո դառնա 300 դրամ: Ուզում են, որ հաց առնենք, տուն գոնե մի հատ հացով գնանք: Երևանում ժամեր կա նախատեսած, որ մինիմալը դառնում է 700 դրամ, ինչի՞ Վանաձորում չկա, թե մեր արյունը կանաչ է»,- ասում է ընկերության վարորդ Արթուրն ու շարունակում, որ խնդրի մասին տեղյակ են ընկերությունում, սակայն դրական պատասխան չեն տվել.
«Մեր բողոքի ակցիայի ձայնը հասցրել ենք Երևան`Yandex տաքսու պարկի տնօրեններին: Բայց դե իրենք էլ ասում են, որ չեն ուզում թանկացնեն, և իրենց հետաքրքիր չէ, թե մեր ընտանիքը ոնց կպահենք»:
Վարորդները նախ հավաքվել էին ընկերության Վանաձորի կառուցի դիմաց, ապա ավտոերթով շրջեցին քաղաքի մի քանի կենտրոնական փողոցներով և կայանեցին Հայքի հրապարակում.
«Իրենք արհամարհական մոտեցում ցուցաբերեցին, գիտեն, որ հավաքվել ենք, իրենց ենք սպասում՝ ասում են մենք չենք գալիս: Իրենք այսքան մարդով են փող աշխատում, բայց արհամարհեցին մեզ»,- ասում են վարորդները:
Որոշ վարորդներ էլ մեքենաների վրայից հեռացրեցին ընկերության լոգոտիպը. «Բոլորս չենք քշում և այնքան ժամանակ մինչև չթանկանա: Թող Yandex տաքսին Վանաձորում չաշխատի: Մեզ մոտ ֆիքսված գումար է՝ 2 կմ-ը 200 դրամ, որևէ փոփոխություն չի լինիում: 4 հոգի նստում է, տանում ես 2 կմ էն կողմ, մարշուտկայից էժան են վճարում: 200 դրամ են տալիս, մի հատ էլ դուռը շխկացնում ու գնում, խի՞»:
Ակցիայի մասնակիցները նաև հայտնեցին, որ եթե Վանաձորում Yandex տաքսի ծառայության մինիմալ գինը չբարձրանա, իրենք այլևս չեն համագործակցի այդ ընկերության հետ:
Նշենք, որ տաքսու վարորդներն այս պահին չեն աշխատում:
Տաթևիկ Ղազարյան
