«Ճիշտ ենք արել». «Իմ քայլի» անդամը՝ Հայկ Մարությանի՝ աշխատավարձերի բարձրացման նախագիծը բոյկոտելու մասին

«Իմ Քայլը» խմբակցության ավագանու անդամները բոյկոտեցին ֆինանսավարկային հանձնաժողովի նիստը, որտեղ պետք է քննարկվեր քաղաքապետի նախագիծը հաստիքացուցակի փոփոխության վերաբերյալ:

Այս մասին ֆեյսբուքի իր էջում գրել է Երեւանի ավագանու «Լույս» խմբակցության անդամ Դավիթ Խաժակյանը:

Խաժակյանը Factor.am-ի հետ զրույցում տեղեկացրեց, որ «Իմ քայլի» անդմաներն ընդհանրապես նիստին չեն մանակցել:

Նրա խոսքով՝ այդ նախագիծը ոչ թե իշխող խմբակցության կողմից էր հեղինակվել, այլ հենց քաղաքապետ Հայկ Մարությանի:

«Իմ քայլը» խմբակցության անդամ Գրիգոր Երիցյանն էլ Խաժակյանի գրառման տակ մեկնաբանել է. « Ճիշտ ենք արել: Այս պահին այսքան»:

Հիշեցնենք, որ Երևանի ավագանու արտահերթ նիստում՝ մայիսի 8-ին, նախատեսվում էր ընդունել որոշում, որի համաձայն քաղաքապետարանի 1700 աշխատակցի աշխատավարձերը կբարձրանան շուրջ 30 տոկոսով:

Այս մասին «Ֆեյսբուք» սոցիալական ցանցի իր էջում գրել է Երևանի քաղաքապետի մամուլի խոսնակ Հակոբ Կարապետյանը:

Երևան քաղաքի ավագանու 2018 թվականի հոկտեմբերի 29-ի որոշման համաձայն Երևանի քաղաքապետ Հայկ Մարությանի աշխատավարձը կազմում է 575 հազար դրամ, սակայն նոր փոփոխություններով նախատեսվում է դարձնել 1 մլն 200 հազար ՀՀ դրամ: Երևանի քաղաքապետարանի բոլոր վարչությունների պետերի աշխատավարձերը կլինեն 641 հազար ՀՀ դրամ՝ ներկայիս 346 հազար դրամի փոխարեն: Քաղաքապետի առաջին տեղակալի աշխատավարձը կդառնա 947 հազար դրամ, մյուս երկու տեղակալներինը՝ 912 հազար դրամ: Երևանի գլխավոր ճարտարապետ Արթուր Մեսչյանի աշխատավարձը որոշման համաձայն կլինի 912 հազար ՀՀ դրամ՝ 443 հազարի փոխարեն: Քաղաքապետի խորհրդականները կստանան 667 հազարական դրամ: Երևանի վարչական շրջանների ղեկավարները կստանան 773 հազարական ՀՀ դրամ՝ ներկայիս 400 հազարի փոխարեն:

Նարեկ Կիրակոսյան