Տնտեսության առանձին ճյուղերում մենաշնորհները պահպանվել են․ տնտեսագետ. ՏԵՍԱՆՅՈՒԹ

Մեզ մոտ կան դասական մենաշնորհային տնտեսություններ՝ իրենց բոլոր արատավոր հետևանքներով: «Մենաշնորհների դեմ պայքար. ովքե՞ր են շուկայի հետհեղափոխական խաղացողները» թեմայով քննարկման ժամանակ նման կարծիք հայտնեց տնտեսագետ Վահագն Խաչատրյանը:

«Հայաստանի Հանրապետությունում տարիներ շարունակվող արատավոր պրակտիկան՝ մենաշնորհներին հովանավորություն, քաղաքականության և տնտեսության սերտաճում, այս քաղաքականությունն ուղղակի տնտեսությունն այդպիսին պետք է դարձներ և դարձրել էր: Սա եղել է նախկին իշխանության կառավարման համակարգը: Չէր կարող լինել մի կողմից՝ քաղաքական մենաշնորհ ունեցող քաղաքական ուժ, և մյուս կողմից՝ չլիներ տնտեսական մենաշնորհ ունեցող գործարարություն: Այս երկուսն իրար հետ սերտորեն փոխկապակցված են»,- ասաց տնտեսագետը:

Ինչ վերաբերում է Նիկոլ Փաշինյանի հայտարարությանը, ապա, ըստ Խաչատրյանի, Հայաստանում իսկապես այնպիսի պայմաններ են ստեղծվել, որ ցանկացած մարդ կարող է ցանկացած տնտեսական գործունեությամբ զբաղվել. «Այլ խնդիր է, թե որքանո՞վ այն մարդիկ, որոնք ցանկանում են որևէ գործունեությամբ զբաղվել, այդ հնարավորություններն ունեն՝ ֆինանսական, շուկայում կարող են տեղավորվել, թե՝ ոչ: Սրանք շատ կարևոր են, որովհետև իրականում ստեղծված մենաշնորհային դաշտը քանդելը ժամանակատար է: Դա կարող է ժամանակատար չլինել, եթե կիրառվեն 1917 թվականի հեղափոխական մեթոդները, ոչ թե 2018-ի Հայաստանի հեղափոխական մեթոդները»:

Վահագն Խաչատրյանը կարծում է, որ նոր Կառավարությունն այս հարցում իմ ամբողջ ռեսուրսները չի օգտագործում: «Օրինակ՝ ինձ շատ հետաքրքրող բնագավառներից մեկը վառելիքի շուկան էր: Եվ երբ սկսեցի հետաքրքրվել, թե ի՞նչն է պատճառը, որ մինչև հիմա մեզ մոտ 3 ընկերություն է զբաղվում բենզինի վաճառքով, երբ հարևան Վրաստանում մինչև 8 ընկերություն է դրանով զբաղվում: Պարզվում է, որ մեզ համար վրացական կողմն արհեստական արգելքներ է սահմանում: Մեր Կառավարությունը, կարծում եմ, անելիք ունի»,- ասաց նա:

Ամփոփելով՝ Վահագն Խաչատրյանն արձանագրեց. «Ամեն դեպքում՝ մեր տնտեսության առանձին բնագավառներում մենաշնորհային դիրքը շարունակում է պահպանվել առանձին գործարարներից կողմից»:

Մանրամասները՝ տեսանյութում:

Աղավնի Սուքիասյան