Գյումրիի Վարդան Աճեմյանի անվան թատրոնը նոր տնօրեն ունի

Գյումրիի Վարդան Աճեմյանի անվան պետական դրամատիկական թատրոնի տնօրեն է նշանակվել է Լյուդվիգ Հարությունյանը։

«ՀՀ մշակույթի նախարարության կողմից հայտարարված Գյումրու Վարդան Աճեմյանի անվան պետական դրամատիկական թատրոնի տնօրենի թափուր հաստիքի համար մրցույթի արդյունքներով թատրոնի տնօրեն նշանակվեց Լյուդվիգ Հարությունյանը», -նշվում է թատրոնի ֆեյսբուքյան էջում տարածված գրառման մեջ։

Տնօրենի մրցույթը կայացել էր ապրիլի 26-ին։ Մշակույթի նախարարությունից մեզ տեղեկացրին , որ Գյումրու թատրոնի տնօրենի մրցույթին մասնակցելու համար դիմել էր 2 հոգի, սակայն մրցույթի օրը ներկայացել էր մեկը՝ Լյուդվիգ Հարությունյանը։

Ավելի վաղ թատրոնի տնօրենի ժամանակավոր պաշտոնակատար և գեղարվեստական ղեկավար Լյուդվիգ Հարությունյանը մեզ հետ զրույցում նշել էր, որ իրեն որպես տնօրենի թեկնածու առաջադրել է թատրոնի ամբողջ հանրույթը։

«Իմ թեկնածությունը ամբողջ հանրույթն է առաջադրել։ Բայց թատրոնը չի կարող մյուսներին արգելել, որ մասնակցեն, ովքեր ցանկություն ունեն, ովքեր գտնում են, որ կարող են թատրոնը առաջ տանել, իրենք ծրագրեր ունեն թատրոնի հետ կապված` կարող են մասնակցել»,- ասել էր Լյուդվիգ Հարությունյանը։

Հիշեցնենք, որ Գյումրու թատրոնի նախկին տնօրենը Տիգրան Վիրաբյանն էր, որը 2018թ-ի հոկտեմբերին նշանակվեց Երևանի փոխքաղաքապետ։ ՀՀ մշակույթի նախարարի պաշտոնակատար Լիլիթ Մակունցի հրամանով էլ վեցամսյա ժամկետով թատրոնի տնօրենի ժամանակավոր պաշտոնակատար էր նշանակվել գեղարվեստական ղեկավար Լյուդվիգ Հարությունյանը:

Էմմա Չոբանյան