Քաղաքականություն
25.04.2019 | 19:34Մոսկվան անգամ «ցեղասպանություն» բառը չարտասանեց, կարծում եմ՝ Երևանը պետք է արձագանքեր: Այսօր լրագրողների հետ զրույցում այս մասին ասաց քաղաքագիտության դոկտոր Հայկ Մարտիրոսյանը՝ պատասխանելով հարցին, թե ինչո՞ւ այս տարի ապրիլի 24-ին Ռուսաստանն ու Հունաստանը որևէ հայտարարությամբ հանդես չեկան Հայոց ցեղասպանության հետ կապված:
«Երևանը պետք է արձագանքեր, որովհետև Պետդուման ճանաչել է, այսինքն՝ պետական մակարդակով Ռուսաստանը ճանաչել է Հայոց ցեղասպանությունը: Այն, որ ԱՄՆ-ն չի արտաբերում «ցեղասպանություն» բառը, հասկանալի է, պետական քաղաքականությունը դա չի ենթադրում, ընդունված չէ, ճանաչված չէ երկրի կողմից»,- հավելեց Մարտիրոսյանը:
Քաղաքագետը, միաժամանակ, ուշադրություն հրավիրեց ՀՀ ԱԳ նախարար Զոհրաբ Մնացականյանի՝ Թուրքիայի հետ հարաբերություններին վերաբերող երեկվա հայտարարության վրա՝ այն «խայտառակ» որակելով:
«Նա ասում է, որ մենք շարունակում ենք պատրաստ լինել առանց նախապայմանների Թուրքիայի հետ շփման: Իսկ ինչո՞ւ առանց նախապայմանների, բա արժանապատվությունը որտե՞ղ է: Լա՛վ, առաջ էինք անարժանապատիվ, հիմա՞ էլ ենք անարժանապատիվ: Այսինքն՝ Կառավարությունից արժանապատիվ հայտարարություններ սկսել են անել միայն վարչապետն ու պաշտպանության նախարա՞րը»,- ասաց Հայկ Մարտիրոսյանը:
ԱԳ նախարարին, սակայն, քաղաքագետը չի մեղադրում, քանի որ կարծում է՝ նա արտաքին քաղաքականություն չի մշակում. «Նա ընդամենը խոսնակ է, ընդ որում՝ շատ զգույշ խոսնակ՝ այս արտգործնախարարի պարագայում»:
Մանրամասները՝ տեսանյութում:
