Հայ-թուրքական արձանագրությունը հետ կանչելն ավելի կոպիտ սխալ էր, քան ստորագրելը. Արամ Սարգսյան. ՏԵՍԱՆՅՈՒԹ

Մեր թիվ մեկ խնդիրը պետք է լինի ոչ թե աշխարհից պահանջել՝ ճանաչել Հայոց ցեղասպանությունը, այլ այնքան ուժեղ լինել, որ մեզ հետ այլևս չկարողանան այդպես վարվել: Ծիծեռնակաբերդում լրագրողների հետ զրույցում այս մասին ասաց «Հանրապետություն» կուսակցության ղեկավար Արամ Սարգսյանը: Նրա կարծիքով՝ Հայոց ցեղասպանության ճանաչման հարցն արտաքին քաղաքականության թիվ մեկ խնդիր դարձնելը փոքրացնում է մեր մանևրելու հնարավորությունները:

Հատուցման պահանջի կարևորության մասին հարցին ի պատասխան՝ Արամ Սարգսյանն ասաց՝ նախ մենք պետք է ճշտենք, թե ինչ պահանջ ենք դնում. «Ցեղասպանության ճանաչում, ճանաչումից հետ՝ հատուցում, հատուցում ասելով՝ ինչ ենք հասկանում… Երբ Հայաստանի Հանրապետությունը կձևակերպի, գնահատականը կտա, այդ ժամանակ ես էլ կգնահատեմ»:

Դիտարկմանը, թե իշխանության գալուց հետո Նիկոլ Փաշինյանն ուղերձ ուղարկեց Թուրքիային, որ պատրաստ է առանց նախապայմանների հարաբերություններ հաստատելուն, Արամ Սարգսյանն ասաց՝ «շատ ճիշտ է արել»:

«Շատ ողջունելի է այդ պահվածքը, որ ասել է՝ առանց նախապայմանների, առանց ցեղասպանության խնդիրը որպես գործոն օգտագործելու՝ պատրաստ եմ Թուրքիայի հետ բանակցելու, որովհետև հարևան երկիր է: Ողջունելի չէ Թուրքիայի պահվածքը»,- հավելեց նա:

Ինչ վերաբերում է հայ-թուրքական արձանագրություններին, Արամ Սարգսյանի խոսքով՝ ավելի կոպիտ սխալ էր դրանք հետ կանչելը, քան ստորագրելը:

Մանրամասները՝ տեսանյութում:

Նարեկ Կիրակոսյան