Տիկի՛ն Նազարյան, կուզենք, որ ասեք՝ ոչ թե կարծում եմ, այլ որոշակիություն բերեք այստեղ․ Արման Բաբաջանյան․ ՏԵՍԱՆՅՈՒԹ

Ազգային ժողովում քննարկվում է ԱԺ փոխնախագահներ Լենա Նազարյանի և Ալեն Սիմոնյանի ներկայացրած «2008 թվականի մարտի 1-ից 2-ը Երևան քաղաքում տեղի ունեցած իրադարձությունների ժամանակ տուժած անձանց աջակցություն ցուցաբերելու մասին» օրենքի նախագիծը։

ԱԺ «Լուսավոր Հայաստան» խմբակցության պատգամավոր Արման Բաբաջանյանը նախագծի հիմնական զեկուցող Լենա Նազարյանից հետաքրքրվեց՝ արդյոք այս նախագծով աջակցություն կստանա՞ն այն քաղաքացիները, որոնք դուրս են մնում նախագծով նախատեսված 63 քաղաքացիների ցուցակից։

«Շատ կարևոր նախագիծ ենք քննարկում և կուզենք շատ որոշակի պատասխաններ: Կուզենք, որ ասեք՝ ոչ թե կարծում եմ, այլ որոշակիություն բերեք այստեղ, օրինակ՝ կար մի քաղաքացի, որը տեղափոխվեց ԱՄՆ, իմ ընտանիքի կազմակերպած դրամահավաքի և տեղի հայ համայնքի ջանքերով վիրահատվեց։ Հիմա նա արտագաղթել է և Ֆրանսիայի քաղաքացի է: Հիմա ի՞նչ անել այդ դեպքերի հետ, արդյոք մենք այս օրենքի նախագծից դուրս չե՞նք դնում վնասվածքներ ստացած այլ մարդկանց և արդյոք այդ օրն իրենց ծառայությունն իրականացնող ոստիկանները ևս կա՞ն աջակցություն ստացողների ցանկում»,- դիմելով ԱԺ փոխնախագահին՝ նշեց Բաբաջանյանը։

Արման Բաբաջանյանի հարցին ի պատասխան՝ Լենա Նազարյանն ասաց, որ պատգամավորի մատնանշած քաղաքացին աջակցություն կստանա, քանի որ մարտիմեկյան իրադարձությունների ժամանակ ստացել է ծանր վնասվածք, իսկ ինչ վերաբերվում է ոստիկաններին, ապա ներկայացված 63 հոգանոց ցուցակում՝ այո՛ կան նաև ոստիկաններ։

Մանրամասները՝ տեսանյութում։

Աղավնի Սուքիասյան