Հասարակություն
17.04.2019 | 18:31«Հրայր Պողոսյանը պետք է ազատ արձակվի, որովհետև նա ոչ մի հանցագործություն չի կատարել»,- այսօր ՀՀ Գլխավոր դատախազության շենքի առաջ բողոքի ակցիայի ժամանակ հայտարարեց մասնակիցներից Սուրեն Պողոսյանը։
Հիշեցնենք, որ Հրայր Պողոսյանը Արմավիրի Զարթոնք գյուղի բնակիչ է, և օրերս դատարանը նրան 2 ամսով կալանավորելու որոշում է կայացրել դպրոցում տեղի ունեցած միջադեպից հետո։
Ակցիայի մասնակիցները դատախազությունից պահանջում են ազատ արձակել համագյուղացի Հրայր Պողոսյանին։ Նրա համագյուղացի Սուրեն Պողոսյանը Factor.am-ի եթերում ասաց, որ իրենք այսօր և վաղը ձեռնպահ կմնան բողոքի ակցիաներ անցկացնելուց՝ սպասելով Հրայր Պողոսյանի ազատ արձակմանը․ «Մենք գնալու ենք կտրուկ և հստակ քայլերի»։
Հրայրի քույրը՝ Իրինա Պողոսյանը, Factor.am-ին պատմեց, որ կալանքի տակ գտնվող եղբայրը բուժօգնության կարիք ունի․ «Մարմնի վրա հետքեր կան, ինքն էլ է վնասված քաշքշուկից։ Ձեռքերը բորբվոքված են, ինչքան գիտեմ՝ ոչ մի բուժօգնություն չի ստացել։ Ես պահանջում եմ, որ մեկ րոպե անգամ ինքը չմնա կալանքի տակ, քանի որ կալանքի տակ մնում են միայն մեղավորները, իսկ ինքը մեղավոր չէ»։
Հրայրի մայրը՝ Սուսաննա Դոխոլյանն ասաց, որ 2 օր կսպասեն ու եթե իր որդին ազատ չարձակվի, կրկին կվերսկսեն բողոքի գործողությունները։ Իսկ քույրը՝ Իրինա Պողոսյանն, ավելի կտրուկ արտահայտվեց․ «Եթե եղբայրս վաղը տանը չլինի, ծայրահեղ գործողությունների կդիմեմ»։
Մանրամասները՝ տեսանյութում:
Ռոբերտ Անանյան
