Քաղաքականություն
16.04.2019 | 16:46Ազգային ժողովում այսօր քննարկվում է Կառավարության կառուցվածքի մասին գործադիրի ներկայացրած որոշման նախագիծը։
Նախագծի հիմնական զեկուցող արդարադատության նախարար Արտակ Զեյնալյանից ԱԺ ԲՀԿ խմբակցության պատգամավոր Սերգեյ Բագրատյանը հետաքրքրվեց՝ գյուղատնտեսությանն առնչվող հարցերն ինչպես են քննարկվելու Էկոնոմիկայի նախարարության հետ կամ ինչո՞ւ Էներգետիկայի նախարարություն ունենալու փոխարեն ունենք Տարածքային կառավարման և ենթակառուցվածքների նախարարություն՝ իր բնորոշմամբ, ոչինչ չասող բառեր։
Պատգամավորի մտահոգություններին ի պատասխան՝ նախարար Զեյնալյանը նշեց, որ Կառավարությունը գտնում է, որ Սահմանադրությամբ իր վրա դրված պարտականությունները այս պահին կարող է կատարել այսպիսի կառուցվածքով։
«Քաղաքականություն մշակող մարմինը Էկոնոմիկայի նախարարությունն է և Գյուղատնտեսության նախարարության իրավահաջորդն է լինելու, հետևաբար որևէ հակասություն չկա, թե նորմատիվ իրավական ակտերը ստորագրող մարմնի անունն ինչ է լինելու»,- ասաց նախարարը՝ նշելով, որ նախարարությունների ցանկացած ցանկ էլ կարող է հաջողություն ունենալ արդյունավետ կառավարման պարագայում, ուստի իրենք այս տարբերակն են ընտրել։
Արտակ Զեյնալյանի պատասխանից հետո Սերգեյ Բագրատյանը նկատեց․ «Պարո՛ն Զեյնալյան, Ձեր պատասխանից հետևում է՝ մենք ոնց որոշել ենք, էնպես էլ պետք է անենք։ Այո՛, սա մեծամասնության կառավարությունն է, և թեև մենք ընդդիմություն ենք, բայց սա նաև մեր կառավարությունն է և չեմ կարող իմ մտքերը չփոխանցել Ձեզ»։
Մանրամասները՝ տեսանյութում։
Աղավնի Սուքիասյան
