Անգիտակից երիտասարդին սանավիացիայի ուղղաթիռով Վանաձորից տեղափոխեցին Երևան. ՏԵՍԱՆՅՈՒԹ

ՀՀ ԱՆ արտագնա անհետաձգելի բժշկական օգնության «արագ արձագանքման» ծառայության շրջանակներում քիչ առաջ Վանաձորից ուղղաթիռով հիվանդ տեղափոխեցին Երևան՝ «Էրեբունի» ԲԿ:

Հիվանդը 23-ամյա երիտասարդ է, որը Վանաձորի ԲԿ է ընդունվել այսօր ժամը 12:00-ի սահմաններում՝ ծայրահեղ ծանր վիճակով:

«Առավոտյան ունեցել է ջերմության բարձրացում, թուլություն, հետո սկսվել են ցնցումներ, գիտակցությունը կորցրել է: Հրավիրվել է շտապօգնություն և տեղափոխվել հիվանդանոց: Երիտասարդն ընդունվել է գիտակցության խորը ընկճումով: Մինչ հետազոտական էտապը մեզ մոտ կրկին ունեցել է ցնցումային համախտանիշ, գիտակցության խորը խանգարումով և կոմայի առաջացումով:
Հետագայում դեղորայքի ֆոնին գիտակցությունը սկսվեց վերականգնել, կայունանալ: Ունենք ուղեղի թաղանթների վարակային բորբոքում: Ուղղաթիռ կանչեցինք, որվհետեւ կրկնվող ցնցումային համախտանիշով հիվանդը, որը կարիք է ունենալու ինդոպացիայի և հետագա տակտիկ բուժման, որպեսզի ժամանակի կորուստ չլինի, ավելի էֆեկտիվ էր ուղղաթիռով տեղափոխել»,- ասաց Վանաձորի ԲԿ-ի ռանիմատոլոգ Հովսեփ Հովհանիսյանը:

Տեղափոխման պահին բժիշկները երիտասարդի վիճակը գնահատեցին կայուն ծանր:
Երևանից Վանաձոր մեքենայով ճանապարհի տևողությունը կազմում է 1 ժամ 30 րոպեից մինչև 2 ժամ, իսկ ուղղաթիռով 40 րոպե:

«Ուղղաթիռով տանելն առանձնահատուկ ծանր դեպքերում ավելի նպատակահարմար է՝ ճանապարհը կարճ է լինում, ճանապարհին խանգարող հանգամանքեր չեն լինում: Մենք ծանր դեպքերում մինչև 3 ժամ ճանապարհ ենք գնում: Դեպք ենք ունեցել, որ ժամանակի երկարատևության պատճառով մեծ բարդություններ ենք ունեցել, հիվանդի մոտ 3 անգամ սրտի կանգ է գրանցվել: Իսկ ուղղաթիռով տանելու դեպքում ժամանակն ավելի կարճ կլինի, ավելի շուտ կհասցվի տեղ և հիվանդի կյանքը փրկելու համար մեծ շանսեր կլինեն»,- Factor.am-ի հետ զրույցում ասաց Վանաձորի ԲԿ-ի շտապօգնության բաժանմունքի վարիչ Սամվել Սահակյանը:

Վանաձորից տեղափոխվող երիտասարդը 6 օր գործող սանիտարական ավիացիայի 4-րդ հիվանդն է:

Մանրամասները՝ տեսանյութում:
Տաթևիկ Ղազարյան