09.06.2026 | 20:55
Հայաստանի հավաքականը բաց թողեց հաղթանակը Մոլդովայի դեմ խաղում. ՏԵՍԱՆՅՈՒԹ
Զավեշտալի ծրագիր է, փորձում են Կառավարությունից գումար շորթել. Հրաչ Բերբերյանը՝ գյուղատնտեսության ապահովագրության մասին
Տնտեսություն
11.04.2019 | 19:03
Գյուղատնտեսության ապահովագրության՝ Կառավարության ծրագիրն Ագրարագյուղացիական միավորման նախագահ Հրաչ Բերբերյանը զավեշտալի է բնորոշում:
«Հերթական դատարկագլխի ծրագիր, որը փորձում է Կառավարությունից գումար շորթել: Գուցե կկարողանա, բայց որևէ հեռանկար չեմ տեսնում ապահովագրության ծրագրի մեջ, քանի դեռ մենք չունենք իդեալական ոռոգման համակարգ, իդեալական բույսերի պաշտպանություն, անասնաբուժություն և հակակարկտային ծառայություն»,- այսօր լրագրողների հետ հանդիպմանն ասաց Բերբերյանը:
Գյուղատնտեսը խնդիրներ է տեսնում նաև անասնապահության ոլորտում. ասում է՝ անկումը շարունակվում է, իսկ իշխանությունները որևէ քայլ չեն անում: «Հիմա ինչ-որ նոր բան են մտածել`վարկային կոմպոնենտով: 10 տարի առաջ նույն բանը Գյուղնախարարություն էր անում, բայց այդ դեպքում վարկային տոկոս չկար, Գյուղնախարարությունը ձեռք էր բերում, տալիս էր, հետո գումարը վերականգնում էր։ Իսկ այստեղ բանկերը գումարներ են աշխատում գյուղացիների հաշվին: Ի՞նչն է փոխվել, ի՞նչ նոր մոտեցման մասին է խոսքը, սա՞ է նոր մոտեցումը: Հիմա գյուղացին պետք է բանկին էլ տոկոսադրույք տա, որ այդ անասունները ձեռք բերի»,- նշեց նա: Փոխարենը Հրաչ Բերբերյանը բերքառատ տարի է կանխատեսում:
Ըստ նրա՝ եթե ապրիլի վերջին ցրտահարություն չլինի, կայուն բերք կունենք: «Այս տարին, կարծես, բարեհաջող է. եղանակային շեշտակի փոփոխություններ չունենք, կարծես թե խուսափում ենք ցրտահարությունից: Ամեն դեպքում, մի փոքր վտանգ ունենք ապրիլի վերջին՝ կապված ցրտահարությունների հետ: Եթե դրանից էլ խուսափեցինք, կարծում եմ՝ կայուն, առատ բերք կունենանք»,- ասաց գյուղատնտեսը:
Անդրադառնալով «Սպայկա» ընկերության շուրջ ստեղծված իրավիճակի մասին հարցին՝ Հրաչ Բերբերյանն ասաց. ««Սպայկա»-ի տնօրենին ձերբակալելու իմաստը չեմ տեսնում: Ի՞նչ պետք է աներ, փախչե՞ր Հայաստանից, թե՞ խոչընդոտեր քննությանը: Գուցե, ընդհակառակը, օգուտ կտար»: Բերբերյանը չի կարծում, որ «Սպայկա»-ն կդադարեցնի գյուղմթերքի մթերումը, ինչի մասին հայտարարել էր ընկերությունը: «Որովհետև գիտի՝ շուկան դատարկ չի մնա: Եթե ինքը չլինի, այլ ընկերություն կգա: Կարծում եմ՝ այդ ընկերության աշխատակիցները շատ բանիմաց են»,- հավելեց նա:
