03.04.2026 | 21:15
Արագ, պարզ, հասանելի․ «ՄՈԳՈ»-ն նոր մասնաճյուղ բացեց Mega Mall-ում
Ինչո՞ւ որոշ պարբերականներ չեն ստացել 40 մլն դրամ ֆինանսավորումը․ ԿԳՆ-ից պարզաբանում են
Հասարակություն
10.04.2019 | 18:12
«Ծիծեռնակ», «Կանչ» և «Աղբյուր» պարբերականները տարածել են հայտարարություն այն մասին, որ չեն ստացել տպագրության համար պետական բյուջեով նախատեսված մոտ 40 մլն դրամը։
Հայտարարությանը միացել է նաև «Հայաստանի ժուռնալիստների միությունը» և կոչ է արել վերականգնել ֆինանսավորման նախկին ձևը, քանզի խելամիտ չէ մանկապատանեկան մամուլի վրա գումարներ տնտեսել և այս պարագայում գերակա պետք է լինի երեխայի շահը, և այն ոչ մի դեպքում չպետք է ստորադասվի այլ նպատակների։
Կրթության և գիտության նախարարության Մարզառազմական և արտադրաուսումնական դաստիարակության վարչության առաջատար մասնագետ Արթուր Կարապետյանը խնդրի վերաբերյալ Factor.am-ի հետ զրույցում նշեց, որ նախարարության կողմից իրականացվող քայլերի արդյունքում պարբերականներին գումարի հատկացումը տեղի չի ունենա նախկին տարբերակով։
«Նախարարությունը գումարի հատկացումը բերել է գնումների դաշտ և ստեղծել մրցակցային պայմաններ։ Պետք է ամսագրերը մասնակցեն նախապես հայտարարված մրցույթին և, ըստ գնումների մասին օրենքի, հաղթում է այն ընկերությունը, որն առաջարկում է ցածր գին։
Հայտարարված մրցույթին ի թիվս այլ պարբերականների, մասնակցել են նաև «Ծիծեռնակ», «Կանչ» և «Աղբյուր» պարբերականները, սակայն նրանց մոտ եղել է գնային տատանում, եղել են ավելի ցածր գին առաջարկողներ, հետևաբար «Ծիծեռնակ», «Կանչ» և «Աղբյուր» պարբերականները չեն հաղթել մրցույթի անցողիկ շեմը, ուստի ֆինանսավորում չեն ստանա»,- մանրամասնեց Կարապետյանը՝ շեշտելով, որ այսուհետ մանկապատանեկան ամսագրերը պետությունից գումար կստանան, եթե նաև իրենց բովանդակությամբ համապատասխանեն Կրթության և գիտության նախարարության մշակած չափանիշներին։
Աղավնի Սուքիասյան
