16.12.2025 | 12:35
Շնչառական վարակներն ակտիվացել են․ ինչպես պայքարել․ ՈՒՂԻՂ
Ռոբերտ Քոչարյանի աջակիցները պատրաստվում են վաղը բողոքի ակցիա իրականացնել, նրա գրասենյակի ղեկավարը խնդրում է չանել
Հասարակություն
08.04.2019 | 17:30
ՀՀ երկրորդ նախագահ Ռոբերտ Քոչարյանի աջակիցները վաղը Վերաքննիչ դատարանի բակում բողոքի ակցիա իրականացնելու մասին հայտարարություն էին տարածել։
Հիշեցնենք, որ վաղը Վերաքննիչ դատարանում կշարունակվի Ռոբերտ Քոչարյանի կալանավորման ժամկետը ևս երկու ամսով երկարացնելու վերաբերյալ բողոքի քննությունը։
Ռոբերտ Քոչարյանի գրասենյակի ղեկավար Վիկտոր Սողոմոնյանը Factor.am-ին ասաց, որ տեղյակ է ակցիա իրականացնելու նախաձեռնությունից, շնորհակալ է այդ մարդկանց, բայց խնդրել է, որպեսզի բողոքի ակցիան չեղարկվի․ «Պետք է այնուամենայնիվ խնդրեմ նրանց վաղը չդիմել այդ միջոցին։ Եկեք առայժմ չստեղծենք հավելյալ լարվածություն և որևէ ճնշում չգործադրենք դատարանի վրա՝ հույս ունենալով, որ իշխանությունները նույնպես այս անգամ զերծ կմնան դրանից»։
Նշենք, որ Ռոբերտ Քոչարյանի նկատմամբ ընտրված խափանման միջոց կալանավորումը ևս երկու ամսով երկարացնելու որոշումը բողոքարկելու վերաբերյալ հաջորդ դատական նիստը տեղի կունենա վաղը՝ ժամը 14:30-ին:
Ռոբերտ Քոչարյանը դեկտեմբերի 7-ից անազատության մեջ է:
Հիշեցնենք, որ նա մեղադրվում է Մարտի 1-ի արյունալի դեպքերի ժամանակ ՀՀ սահմանադրական կարգը տապալելու և Քրեական օրենսգրքի 311-րդ հոդվածի 4-րդ մասի 2-րդ կետով՝ առանձնապես խոշոր չափի կաշառք ստանալու համար։
Լիլիթ Շաբոյան
