09.10.2026 | 23:47
Վրաստանում սպանության համար հետախուզվող է հայտնաբերվել. ՀՀ և Վրաստանի ՆԳՆ-ների համագործակցության արդյունքը
ԱՏՁՄ-ն կոչ է անում ԱԺ-ին դեմ քվեարկել «ՏՏ ոլորտի պետական աջակցության մասին» օրենքի նախագծին և հետ ուղարկել ՀՀ Կառավարություն լրամշակման
Տնտեսություն
05.04.2019 | 17:16
Երևանում այսօր մեկնարկել է Առաջատար տեխնոլոգիաների ձեռնարկությունների միության (ԱՏՁՄ) 19-րդ տարեկան համաժողովը: Համաժողովի ընթացքում ԱՏՁՄ-ն հայտարարություն է տարածել, որն ամբողջությամբ ներկայացնում ենք ստորև:
««Տեղեկատվական տեխնոլոգիաների ոլորտի պետական աջակցության մասին» Հայաստանի Հանրապետության օրենքում փոփոխություններ և լրացումներ կատարելու մասին օրենքի նախագծի վերաբերյալ
Ներկայումս շրջանառության մեջ է դրվել «Տեղեկատվական տեխնոլոգիաների ոլորտի պետական աջակցության մասին» Հայաստանի Հանրապետության օրենքում փոփոխություններ և լրացումներ կատարելու մասին օրենքի նախագիծը, որում տեղ են գտել դրույթներ, որոնց կիրառումը կխոչընդոտի և կսահմանափակի տեղական Տեղեկատվական, Հեռահաղորդակցական և Բարձր տեխնոլոգիաների ոլորտում գործունեություն իրականացնող տնտեսվարող սուբյեկտների բնականոն զարգանալու իրավունքները:
Գործող օրենսդրությունը պետք է կոչված լինի զարգացնելու տեղական Տեղեկատվական, Հեռահաղորդակցական և Բարձր տեխնոլոգիաների ոլորտը: Արտոնություններ տրամադրելով օտարերկրյա ընկերություններին՝ խիստ անբարենպաստ պայմաններ ենք ստեղծում տեղական ընկերությունների համար, քանի որ օտարերկրյա ընկերությունները ոչ միայն առավելություն կունենան հայկական ընկերությունների նկատմամբ, այլև իրենց մոտ կարող են կենտրոնացնել որակյալ տեղական աշխատուժը՝ դրանով իսկ խոչընդոտելով տեղական ՏՏ և ԲՏ ոլորտի զարգացումը:
Առաջատար տեխնոլոգիաների ձեռնարկությունների միությունը կոչ է անում ՀՀ Ազգային Ժողովին դեմ քվեարկել վերը նշված օրենքի նախագծին և հետ ուղարկել ՀՀ Կառավարություն լրամշակման՝ առաջարկելով առանձնացնել ՀՀ ՏՏ և ԲՏ նորաստեղծ ընկերություններին պետական աջակցության մասին օրենքը միջազգային կազմակերպություններին ներգրավելու նպատակով մշակվող օրենքի դրույթներից:
Առաջարկում ենք նմանատիպ օրենսդրական նախաձեռնությունները քննարկել ոլորտի մասնագետների հետ՝ հնարավոր ռիսկերը հաշվի առնելու և արդյունավետության մակարդակը բարձրացնելու համար։ Մենք մեր պատրաստակամությունն ենք հայտնում հանդիպման հնարավորության դեպքում ներկայացնել մեր դիրքորոշումն ու առաջարկները։
