Դատախազը կգնա դատարան և կներկայացնի համապատասխան հայց. ինչպե՞ս է հետ վերցվելու ապօրինի հարստացածների գույքը. ՏԵՍԱՆՅՈՒԹ

Գլխավոր դատախազ Արթուր Դավթյանն ԱԺ-ում լրագրողների հետ զրույցում անդրադառնալով հարցին, թե ի՞նչ փուլում են առանց մեղադրական եզարակացության գույքի բռնագրավման փաթեթի պատրաստական աշխատանքները, և արդյո՞ք դատախազությունն է հանդես գալու պետության դերում, արձագանքեց. «Որպեսզի որևէ մեկի մոտ մտահոգություն չառաջանա, մանրամասնեմ. տարբեր անվանումներ տրվեցին՝ անցումային արդարադատություն, առանց մեղադրական դատավճռի գույքի բռնագրավում և այլն: Հիմա աշխատանքային խումբը մշակում է օրենսդրական նախագիծ, որը պետք է կարգավորի մի հարց, որով, միևնույն է, լուծումը տալու է դատարանը։ Նոր օրենքով այլ քրեաիրավական մեխանիզմներ են առաջարկվելու, որով դարձյալ դատախազը մի կողմում, մյուս կողմում՝ կոնկրետ գույքի սեփականատերը դատարանում ներկայացնելու են իրենց փաստարկները, և դատարանն է որոշելու՝ մարդու գույքը ապօրինի է ձեռք բերվել, թե՞ օրինական։ Որևէ պետական պաշտոնյա կամ մարմին չէ, որ գործընթացի արդյունքում սեփականությունից կզրկի: Միևնույն է՝ դատարանն է իրականացնելու արդարադատություն»։

Գլխավոր դատախազի խոսքով՝ ցանկացած անձի պատկանող գույքի դեպքում էլ նման կասկած կարող է առաջանալ, այս պահին աշխատանքային խումբը մեխանիզմները մշակելու վրա է աշխատում։

«Թե ինչպիսի աղբյուրներ կարող են վկայակոչվել, որոնց առկայության դեպքում դա կարող է առիթ հանդիսանալ համապատասխան վարույթ իրականացնելու, և ինչպիսի պայմանների դեպքում է, որ, օրինակ, դատախազը կգնա դատարան և կներկայացնի համապատասխան հայց»,- պարզաբանեց Արթուր Դավթյանը:

Մանրամասները՝ տեսանյութում:

Նարեկ Կիրակոսյան