15.12.2024 | 21:00
Այսօր երիտասարդներն ավելի ինքնուրույն են, բայց պակաս տեղեկացված. ապաքաղաքական զրույց Անուշ Ասլիբեկյանի հետ․ ՏԵՍԱՆՅՈՒԹ
Մարտի 1-ի գործի շրջանակներում հարցաքննվել է նախկին դատավոր Պարգև Օհանյանը
Հասարակություն
27.03.2019 | 19:33
Մարտի 1-ի արյունալի իրադարձությունների գործի շրջանակներում ՀՔԾ-ում վկայի կարգավիճակով հարցաքննվել է նախկին դատավոր Պարգև Օհանյանը։ Վերջինս Factor.am-ի հետ զրույցում ասաց, որ հարցաքննությունն ընթացել է արդարադատությանը միջամտելու փորձերի վերաբերյալ իր՝ նախկինում կատարած հայտարարությունների կապակցությամբ։
-Պարոն Օհանյա՛ն, Ձեր տված ցուցմունքում ի՞նչ հանգամանքների եք անդրադարձել։
-Եթե հիշում եք, Արմեն Գևորգյանին մեղադրանք էր առաջադրվել արդարադատությանը խոչընդոտելու համար։ Միջամտությունը քրեորեն պատժելի արարք է, և ես իմ հարցազրույցներից մեկում ասել էի, որ տեղյակ եմ, միջամտություններ, իհարկե, եղել են։ Այդ առիթով հրավիրել էին հարցաքննության։
-Մասնավորապես Արմեն Գևորգյանի՞ միջամտության մասին եք նշել Ձեր ցուցմունքում, թե՞ առհասարակ՝ ընդհանուր քաղաքական միջամտության փորձերի։
-Պարզվեց, որ այդ գործը քննվում է Մարտի 1-ի գործի շրջանակներում, ոչ թե առանձին, և ստացվեց այնպես, որ ես որպես վկա հրավիրվեցի հարցաքննության։ Ես ցուցմունք եմ տվել՝ կապված միջամտությունների հետ՝ նշելով, որ միջամտություններ եղել են, դրանք հերքել չի կարելի։
-Կասե՞ք, թե կոնկրետ ով է փորձել միջամտել, Ձեր հանդեպ ճնշում եղե՞լ է։
-Ճնշում բառը տեղին և իրավական չէ։ Ես ցուցմունք եմ տվել և հանրությանն էլ է հայտնի «Ռոյալ-Արմենիայի» գործը և այլ գործեր։
-Ձեզ անձամբ Արմեն Գևորգյանը հանդիպե՞լ է կամ փորձե՞լ է ուղղորդել՝ այս կամ այն գործով որևէ որոշում կայացնել։
-Չէ, անձամբ ինձ՝ ոչ։ Լուսահոգի Գևորգ Մհերյանի միջոցով էր «Ռոյալ-Արմենիայի» գործով միջամտությունը, որ ցանկացել են «կուրսի լինել», և ակնհայտ էր, որ հետաքրքրվածություն կար՝ նախագահի մակարդակով։ Բայց Մհերյանը հիմա ողջ չէ։
Նշենք, որ նախկին դատավորի նշած անձը, որը իր պնդմամբ փորձել է միջամտել արդարադատություն իրականացնելուն, Գևորգ Մհերյանն է՝ ՀՀ նախկին փոխոստիկանապետը, որը սպանվել է 2009 թվականին գլխի շրջանում ստացան հրազենային կրակոցներից։ Մհերյանը փոխոստիկանապետ է նշանակվել է 2008-ի հուլիսի 2-ին, իսկ մինչ այդ եղել է Ռոբերտ Քոչարյանի, այնուհետև Սերժ Սարգսյանի օգնականը: Իսկ նյութում նշված «Ռոյալ- Արմենիայի» քրեական գործն էլ հարուցվել էր 2005 թվականին։
«Ռոյալ Արմենիայի» ղեկավարները մեղադրվում էին մաքսանենգության, հարկերից խուսափելու, փաստաթղթեր կեղծելու համար: Մեղադրող կողմը նրանց համար պահանջում էր երկարատև ազատազրկում: Մեղադրյալները չէին ընդունում իրենց մեղքը` պնդելով, որ գործը իրենց նկատմամբ «սարքվել է»: Աղմկոտ քրեական գործը քննել և արդարացման դատավճիռ է կայացրել դատավոր Պարգև Օհանյանը: Այս որոշման արդյունքում վերջինիս լիազորությունները Ռոբերտ Քոչարյանի հրամանագրով դադարեցվեցին։
Ի դեպ, թավշյա հեղափոխությունից հետո «Ռոյալ Արմենիայի» սեփականատեր Գագիկ Հակոբյանը հաղորդում է ներկայացրել ՀՀ գլխավոր դատախազին՝ իր դեմ հարուցված քրգործով փորձագետներ Վասիլի Առուստամյանի, Աշոտ Թևիկյանի և Գևորգ Մկրտչյանի կողմից հանցագործություն կատարելու փաստի մասին:
Լիլիթ Շաբոյան
