16.11.2024 | 22:58
«Մանկական Եվրատեսիլ – 2024»-ում հաղթեց Վրաստանը
Պետական լիազոր մարմինների հանցավոր անտարբերության պատճառով պատասխանատվություն է կրելու ՀՀ-ն. Մանվել Գրիգորյանի փաստաբան
Հասարակություն
27.03.2019 | 18:31
Մանվել Գրիգորյանի կալանավորումից հետո նրա առողջական վիճակում բժիշկները պարբերաբար բացասական դինամիկա են արձանագրել, ինչի մասին մենք տեղյակ ենք պահել պատկան մարմիններին: Մարտի 27-ին լրագրողների հետ հանդիպմանն ասաց Գրիգորյանի փաստաբաններից Լևոն Բաղդասարյանը:
«Փաստաբանները սկսեցին բարձրաձայնել, որ բացասական դինամիկա կա, պետություն, դու պոզիտիվ պարտավորություն ունես՝ կա՛մ մարդուն բուժիր, կա՛մ առավել ևս, որ կալանքի հիմքեր չենք տեսնում, անձը թող լինի ազատության մեջ: Անցավ ևս 2-3 ամիս, բժիշկներն արդեն ահազանգեցին, որ գլյուկոզան արյան մեջ հասնում է 25-30, և պետք է ինսուլինը ավելացնել: Այսօր անձը ստանում է 100 միավոր ինսուլին: Միջազգային նորմով՝ 50-ից բարձրի դեպքում համարվում է, որ կյանքին վտանգ է սպառնում»,- մանրամասնեց փաստաբանը:
Բաղդասարյանի խոսքով՝ պաշտպանյալին ասել են, որ ցանկանում են կալանքի հետ կապված դիմել Մարդու իրավունքների եվրոպական դատարան. «Արգելեց: Ասաց՝ Հայաստանին դատի չեմ տա: Հիվանդությունների հետ կապված՝ հորդորեցինք, ասացինք՝ այսպես չի կարող լինել, դանդաղ մահանում ես, որից հետո դիմեցինք ՄԻԵԴ»: Ըստ փաստաբանի՝ եվրադատարանից արագորեն արձագանքել են, մի քանի ապացույցներ պահանջել, որոնք ստանալուց հետո ՀՀ Կառավարությանը մինչև ապրիլի 2-ը ժամանակ են տվել՝ իրենց փաստարկները ներկայացնելու: «Դրանից հետո կուղարկեն մեզ, մենք կա՛մ Կառավարության փաստարկները կընդունենք ի գիտություն, կա՛մ մեր առարկությունները կներկայացնենք: Ցավոք՝ պետական լիազոր մարմինների անգործության և հանցավոր անտարբերության պատճառով վաղը պատասխանատվություն է կրելու Հայաստանի Հանրապետությունը»,- հայտարարեց Լևոն Բաղդասարյանը:
Հիմա, նրա տեղեկացմամբ, Մանվել Գրիգորյանը տեղափոխվել է ստացիոնար բուժման և համալիր ստուգումներ է անցնում:
