Բոլոր ռիսկերից քաջատեղյակ ենք ու վախենալու բան չունենք. Ավինյանը՝ Ամուլսարի դատերի մասին. ՏԵՍԱՆՅՈՒԹ

Որևէ տնտեսվարողի նկատմամբ Կառավարությունը խտրական վերաբերմունք չունի։ Այսօր ԱԺ-ում լրագրողների հետ զրույցում վստահեցրեց ՀՀ փոխվարչապետ Տիգրան Ավինյանը՝ անդրադառնալով «Լիդիան Արմենիա» ընկերության և Կառավարության միջև առկա տարաձայնությանը:

Ինչ վերաբերում է «Լիդիան Արմենիա»-ի հայտարարությանը՝ կապված արբիտրաժային դատարան դիմելու հետ, Ավինյանը նշեց. «Կարծում եմ, որ մայիսին որոշակի հարցերի պատասխաններ կունենանք, որովհետև հիդրոերկրաբանական հետազոտություն է իրականացվում Ամուլսարում, որը որոշակի պատասխաններ կտա, և այն կասկածները, որոնք բարձրաձայնվում էին փորձագետների կողմից, կստանան արձագանք»։

Փոխվարչապետը հիշեցրեց, որ ընկերության հետ կապված հետազոտութուններ են արվում։ Նրա խոսքով, եթե հետազոտությունների արդյունքում պարզվի, որ բոլոր ռիսկերը վերահսկելի են, ապա ծրագրի իրականացման համար խոչընդոտներ որևէ մեկի կողմից չեն լինի։

«Եթե տեսնենք, որ կան որոշակի ռիսկեր, որոնք վերահսկելի չեն, համապատասխան որոշում կկայացնենք, եթե եզրակացությունը հօգուտ «Լիդիան Արմենիա»-ի լինի, ապա ընկերությունը դատարան դիմելու կարիք չի ունենա»,- ընդգծեց փոխվարչապետը։

Տիգրան Ավինյանը համակարծիք չէ նաև այն տեսակետին, թե ընկերության կողմից արբիտրաժային դատարան դիմելը սպառնալիք է Կառավարությանը։ Հարցին՝ հաշվարկվել է, թե ինչ վնասներ կհասցվի ՀՀ-ին, եթե ընկերությունը դիմի դատարան և շահի դատը, Տիգրան Ավինյանը պատասխանեց. «Մենք բոլոր ռիսկերից քաջատեղյակ ենք ու վախենալու որևէ բան չունենք»։

Մանրամասները՝ տեսանյութում:

Նարեկ Կիրակոսյան