Հասարակություն
26.03.2019 | 20:40
Հայաստանում վերջին շաբաթներին ակտիվորեն քննարկվում է Երևանի Իրինա Ռոդնինայի անվան գեղասահքի դպրոցի անվանափոխության հնարավորությունը: Նման առաջարկով են հանդես եկել Երևանի ավագանու անդամները՝ Բաքու Ռոդնինայի այցից և այնտեղ, այսպես կոչված, «Խոջալուի իրադարձություններին» նվիրված երթին մասնակցելուց հետո: ՌԴ Պետդումայի պատգամավոր, եռակի օլիմպիական չեմպիոն Իրինա Ռոդնինան, սակայն, հայտարարում է, որ Բաքվում «հակահայկական» միջոցառման չի մասնակցել:
«Բացարձակապես… Ես մասնակցել եմ ավելի քան քսան տարի առաջ տեղի ունեցած ողբերգական իրադարձությունների հիշատակի երթին… Ամենուր, որտեղ մարդիկ մահանում են, դա ողբերգություն է: Մարդիկ հիշում են նրանց, ովքեր տուժել են: Սա չի նշանակում է, որ դա ինչ-որ մեկի դեմ է: Մեզ՝ ռուսներիս համար, ինչպես Հայաստանն ու հայերը, այնպես էլ Ադրբեջանն ու ադրբեջանցիները երկրներ են և մարդիկ, որոնք ժամանակին Խորհրդային Միության մաս են կազմել»,- «Ռուսարմինֆո»-ի հետ զրույցում ասել է Ռոդնինան:
Նա նաև հավելել է, որ իրականում խոսքը ոչ թե իր անվան դպրոցի, այլ սահադաշտի մասին է, որը «կառուցվել է ռուսական փողերով»:
«Ոչ թե դպրոցն է կրում իմ անունը, այլ սահադաշտը, որը կառուցվել է Ռուսաստանի Դաշնության միջոցներով. միլիոնավոր միջոցներ, որոնք բացառապես Ռուսաստանից են եկել: Դա նրանց իրավունքն է, ինչ ուզում են, այն էլ թող անեն»,- ասել է նախկին գեղասահորդուհին:
Ռոդնինան նշել է, որ հանգիստ է վերաբերվում անվանափոխությանը, սակայն «վիրավորված է այն մարդկանց համար, ովքեր իրենց սիրտն ու հոգին են դրել» շինարարության մեջ:
Իրինա Ռոդնինան նաև հավելել է, որ իր խնդիրը զանգվածային մանկական սպորտի զարգացումն է, և Բաքու այցելել է՝ նաև այդ ոլորտին վերաբերող հարցեր քննարկելու նպատակով:
Հիշեցնենք, որ ՌԴ Պետդումայի պատգամավոր, հայ-ռուսական խորհրդարանական բարեկամական խմբի անդամ Իրինա Ռոդինան ռուսաստանցի այլ պատգամավորների հետ Բաքվում մասնակցել էր, այսպես կոչված «Խոջալուի իրադարձություններին» նվիրված երթին, ինչը բացասական արձագանքի էր արժանացել Հայաստանում: Հարցին ՌԴ Պետդումայում ելույթի ժամանակ անդրադարձել էր նաև ՀՀ Ազգային ժողովի նախագահ Արարատ Միրզոյանը:
