30.05.2026 | 17:53
ՄԻՊ -ը Դիլիջանում հանդիպել է բռնի տեղահանված կանանց
Լոնդոնն ու Բրյուսելը համաձայնեցրել են Brexit-ի հարցով նոր գործարքը
Քաղաքականություն
12.03.2019 | 12:32
Բրյուսելը հույս ունի, որ Լոնդոնը կողմ կքվեարկի Brexit-ի հարցով նոր գործարքին: Այս մասին Twitter-ում գրել է Եվրախորհրդարանի ղեկավար Անտոնիո Տայանին՝ դրական գնահատելով Brexit-ի հարցով Մեծ Բրիտանիայի վարչապետ Թերեզա Մեյի հետ անցկացված բանակցությունները, գրում է ՏԱՍՍ-ը:
«Մենք արեցինք հնարավոր ամեն ինչ՝ Մեծ Բրիտանիային հանգստացնելու համար: Անհամբերությամբ սպասում ենք, որ Լոնդոնը կողմ կքվեարկի նորացված գործարքին: Հույս ունեմ, որ առողջ դատողությունը կհաղթանակի»,- գրել է Տայանին:
Երկուշաբթի երեկոյան Տայանին և Եվրահանձնաժողովի ղեկավար Ժան-Կլոդ Յունկերը Թերեզա Մեյի հետ Ստրասբուրգում քննարկել են Եվրամիության կազմից Մեծ Բրիտանիայի դուրս գալու գործարքը: Ավելի ուշ Մեյը հայտարարել է, որ կատարել է բրիտանացի պատգամավորների պահանջը՝ համաձայնագրում փոփոխության հասնելով Իռլանդիայի սահմանի հարցով:
Այսօր Համայնքների պալատում նախանշված է Brexit-ի հարցով կրկնակի քվեարկությունը: Նախորդ քվեարկության ժամանակ խորհրդարանականները մերժել էին Բրյուսելի հետ գործարքի՝ Մեյի առաջարկած տարբերակը, որում բոլոր փոփոխություններն այժմ համաձայնեցված են:
Եթե այս անգամ էլ քվեարկությունը տապալվի, պատգամավորները կարող են քվեարկել Եվրամիությունից Մեծ Բրիտանիայի ելքի ժամկետը հետաձգելու համար: Brexit-ը ծրագրված է մարտի 29-ին:
