Հեղափոխությունը հզոր ազդակ էր առ այն, որ Հայաստանի ժողովուրդը մտադիր է ստանձնել երկրում տեղի ունեցող զարգացումների պատասխանատվությունը. ՆԱՏՕ-ի պաշտոնյա. ՏԵՍԱՆՅՈՒԹ

«ՆԱՏՕ-ի շաբաթը մենք անվանում ենք հանրային դիվանագիտության միջոցառում։ Դրա միջոցով մենք ցանկանում ենք հասարակությանը տեղեկացնել ՆԱՏՕ-ի և Հայաստանի միջև գոյություն ունեցող գործընկերության հարուստ ընդգրկման մասին։ Միջոցառումները վերաբերվում են երկրի պաշտպանական սեկտորին, բայց նաև վերաբերվում են հաստատությունների կառուցմանը»,- «ՆԱՏՕ-ի շաբաթվա» միջոցառումների սկիզբն ազդարարող մամուլի ասուլիսում հայտարարեց Հարավային Կովկասում ՆԱՏՕ-ի կապի գրասենյակի ղեկավար Ռոզարիա Պուլյիսը։

Նա կարևորում է հատկապես ՆԱՏՕ-ի վերաբերյալ քաղաքացիների բարձր տեղեկացվածությունը․ «Անցյալ տարվա թավշյա հեղափոխությունը հզոր ազդակ էր առ այն, որ Հայաստանի ժողովուրդը մտադիր է ստանձնել երկրում տեղի ունեցող զարգացումների պատասխանատվությունը։ Անշուշտ, պատասխանատվությունը պետք է խարսխվի տեղեկատվության վրա, և ահա թե ինչու մենք ուզում ենք, որ դուք՝ հասարակությունը, լիարժեք տեղեկացված լինեք, թե ինչ է կատարվում»,- ասաց Ռոզարիա Պուլյիսը։

Հյուսիսատլանտյան դաշինքի պաշտոնյայի ներկայացմամբ՝ «ՆԱՏՕ-ի շաբաթվա» միջոցառումներից մեկն ունի «Բարեվարքի կառուցում» անվանումը․ «Սա մի ծրագիր է, որը անվտանգության և պաշտպանության ոլորտում օգնում է Հայաստանին պայքարել կոռուպցիայի հնարավոր դրսևորումների դեմ, և մանավանդ թավշյա հեղափոխությունից հետո Հայաստանի վերափոխումներին օժանդակելուց ավելի հզոր բան մենք դժվար թե կարողանանք անել»,- հայտարարեց Ռոզարիա Պուլյիսը։

Նրա խոսքով՝ ՆԱՏՕ-ի բրյուսելյան կենտրոնակայանից մեծաքանակ պատվիրակություն է ժամանելու Հայաստան։ Մասնավորապես, այսօր սպասվում են ՆԱՏՕ-ի գլխավոր քարտուղարի Հարավային Կովկասի և Կենտրոնական Ասիայի հարցերով հատուկ ներկայացուցիչ Ջեյմս Ապաթուրայի հանդիպումները Հայաստանի նախագահի, պաշտպանության նախարարի, արտգործնախարարի, Ազգային ժողովի խոսնակի տեղակալների հետ, իսկ երեկոյան պարոն Ապաթուրայը հանդես կգա մամուլի ասուլիսով։

Մանրամասները՝ տեսանյութում:

Ռոբերտ Անանյան