Ադրբեջանի իշխանությունը չի էլ մտածում, որ Ղարաբաղի հարցի կարգավորման որևէ տարբերակ պիտի ընդունելի լինի Ղարաբաղի ու Հայաստանի ժողովրդի համար․ Նիկոլ Փաշինյան. ՏԵՍԱՆՅՈՒԹ

«Ընդհանուր առմամբ կան այնպիսի գնահատականներ, որ Հայաստանը ԼՂՀ-ի հարցում իր դիրքորոշումը կոշտացրել է, բայց ես կարող եմ ասել, որ Հայաստանի դիրքորոշումը, այսինքն՝ մեր կառավարության դիրքորոշումը չի փոխվել։ Մենք ասել ենք, որ կլինենք իրավիճակին ադեկվատ, համարժեք։ Դեռևս նախորդ գումարման ԱԺ-ում, ես այս ամբիոնից հայտարարություն արեցի, որը կապված էր այդ պահի իրավիճակի հետ, և ես ասացի, որ Ղարաբաղի հարցի ցանկացած լուծում պիտի ընդունելի լինի Հայաստանի ժողովրդի համար, Ղարաբաղի ժողովրդի համար և Ադրբեջանի ժողովրդի համար»,- այսօր ԱԺ-ում հարցուպատասխանի ժամանակ ասաց կառավարության ղեկավար Նիկոլ Փաշինյանը։

Վարչապետը նշեց, որ այս հայտարարությունը այնքան էլ հեշտ հայտարարություն չէ, բայց սա արվել է բանակցային նորմալ մթնոլորտ ստեղծելու համար:

«Սակայն ադրբեջանական կողմից համանման հայտարարություններ չեն հնչում և ընդհակառակը՝ անընդհատ խոսվում է, ակնարկներ են արվում, ուժով, ռազմական ճանապարհով հարցերը լուծելու հնարավորության մասին են խոսում, արվում են հայտարարություններ, որոնք ակնհայտ են դարձնում, որ Արդբեջանի իշխանությունը, կառավարությունը չի էլ մտածում, որ հարցի կարգավորման որևէ տարբերակ պիտի ընդունելի լինի Ղարաբաղի և Հայաստանի ժողովրդի համար, և մենք այս իրավիճակում հավատարիմ ենք մնում մեր դիրքորոշմանը՝ իրավիճակին ադեկվատ մնալ»,- ասաց ՀՀ վարչապետը:

Մանրամասները՝ տեսանյութում։

Լիլիթ Շաբոյան