Միջադեպ՝ Նարեկ Մալյանի և «Ռեստարտ» նախաձեռնության անդամների միջև․ Ոստիկանությունը գործ կհարուցի՞

Երեկ գիշերը Նարեկ Մալյանը ֆեյսբուքի իր էջի ուղիղ եթերում հայտարարել է, թե հարձակման է ենթարկվել «Ռեստարտ» նախաձեռնության անդամների կողմից։ Նա ասել է, որ իրեն են մոտեցել մոտ 10 հոգի, փորձել ճանկռել, ու քաշքշելով  մի կողմ տանել՝ անցկացնել Ամիրյան փողոցը։ Մալյանը նաեւ նշել է, որ դիմադրելով իրեն ճանկռել փորձող ակտիվիստներին,  ապտակել է Դավիթ Պետրոսյանին։

Քիչ անց միջադեպին անդրադարձել  է նաև «Ռեստարտ» ուսանողական նախաձեռնության անդամ Դավիթ Պետրոսյանը՝ ֆեյսբուքյան ուղիղ եթերում պատմելով, որ տուն մտնելու վայրից Նարեկ Մալյանին վերցրել են ու փորձել են անցկացնել փողոցը՝ տանելով աղբամանի կողմ։ Պետրոսյանը նշել է, որ իրենք  Նարեկ Մալյանին մատով չեն կպել, չեն հայհոյել։ Նա նաեւ հերքել է  ապտակելու հետ կապված Մալյանի ասածը։

Միջադեպի մասնակիցներին են մոտեցել ոստիկանության ծառայողները, որոնք, Պետրոսյանի ներկայացմամբ, թույլ չեն տվել, որ Նարեկ Մալյանը հայտնվի աղբամանում, և միջադեպի  մասնակիցներին  տեղափոխել բաժանմունք։ Միջադեպի վերաբերյալ ոստիկանությունում նյութեր են նախապատրաստվում, հայտնում են մամուլի ծառայությունից․ «Մարտի 4-ին, կեսգիշերն անց, Երևան քաղաքի Ամիրյան փողոցի 18 հասցեի մոտ միջադեպ է տեղի ունեցել: Տարածքում ծառայություն իրականացնող ոստիկանության ծառայողները կանխել  և բերման են ենթարկել միջադեպի 6 մասնակցի և հրավիրել մեկ քաղաքացու: Բերման ենթարկված անձինք բաց են թողնվել»։

Այսօր վարչապետ Նիկոլ Փաշինյանը ֆեյսբուքի իր էջում գրառում է կատարել՝ հավանաբար անդրադառնալով վերոհիշյալ միջադեպին․ «Հայաստանում բռնությամբ հարցեր լուծելու որեւէ փորձ պետք է արժանանա կոշտ իրավական հակազդեցության: Բոլոր նրանք ովքեր Նոր Հայաստանում գործում են բռնության, ստի, կեղծիքի տարածման տրամաբանությամբ՝ գործում են ընդդեմ Հայաստանի, ընդդեմ ժողովրդավարության, ընդդեմ ժողովրդի»,- գրել է Փաշինյանը:

Ռոբերտ Անանյան