13.11.2024 | 23:28
Էրդողանը Թրամփի հետ հանդիպման հույս է հայտնել և խոսել Մասկի հետ համագործակցելու ցանկության մասին
ԵՏՄ-ի հետ կապված մեծ հույսեր չեմ փայփայում, այն սկսում է ավելի շատ քաղաքականացվել. Լուկաշենկո
Քաղաքականություն
01.03.2019 | 17:42
Եվրասիական տնտեսական միությունը սկսում է ավելի շատ քաղաքականացվել: Այս մասին հայտարարել է Բելառուսի նախագահ Ալեքսանդր Լուկաշենկոն հասարակական և փորձագիտական շրջանակների ու բելառուսական և արտասահմանյան լրատվամիջոցների ներկայացուցիչների հետ հանդիպման ժամանակ, հաղորդում է ԲԵԼՏԱ-ն:
«Եթե անկեղծ, ես մեծ հույսեր չեմ փայփայում ԵՏՄ-ի հետ կապված: Չափազանց շատ տարաձայնություններ կան և, որ բացարձակ անընդունելի է, տնտեսական միությունը սկսում է ավելի շատ քաղաքականացվել»,- ասել է Լոշւկաշենկոն:
Նա ընդգծել է, որ հենց ԵՏՄ շրջանակում ընդունված որոշումները չեն կատարվում. «Իսկ եթե այս կամ այն խնդրի լուծման հարցով խելամիտ առաջարկություն ենք ներկայացնում, այդ լուծումն այնքան ենք բովանդազրկում, որ այն այլևս որևէ նշանակություն չի ունենում»:
Լուկաշենկոյի խոսքով՝ վեճեր կան միության անդամ Ղազախստանի և Ղրղզստանի միջև, Բելառուսն ու Ռուսաստանը նույնպես բազմաթիվ խնդիրներ ունեն: «Չափազանց շատ ազգային եսասիրություն կա, ինչպես ռուսաստանցի գործիչներն են ասում՝ քննադատելով Ամերիկային: Մեզ մոտ նույնն է»,- հավելել է նա:
Անդրադառնալով ԵՏՄ-ում Բելառուսի ապագա նախագահությանը՝ այդ երկրի նախագահը նշել է, որ առանձնապես առաջընթացի հույս չունի, քանի որ այնտեղ բոլոր որոշումներն ընդունվում են կոնսենսուսով: Այդ պատճառով, ըստ նրա, մեկ պետության դիրքորոշումը հազիվ թե որևէ բան փոխի, եթե ԵՏՄ անդամ գեթ մեկ պետություն դեմ է, իսկ «ստեղծված միտումը մեծ հույսեր չի տալիս»:
«Բազմաթիվ խնդիրներ կան, այդ պատճառով պետք է հասկանաք, որ մենք գործելու ենք՝ խստորեն հետևելով կնքված պայմանագրերին և համաձայնագրերին, ձգտելու ենք առաջ մղել ավելի խորը ինտեգրում, որքան դա հնարավոր է: Ոչ միայն այն պատճառով, որ մենք կապված ենք նման ինտեգրման, այլև այն պատճառով, որ դա մեզ ձեռնտու է»,- ամփոփել է Ալեքսանդր Լուկաշենկոն:
