16.12.2025 | 09:40
ՀՀ որոշ շրջաններում ձյուն է տեղում․ ինչ իրավիճակ է ճանապարհներին
10 զոհերի սպանությունը չի կարող մնալ անպատիժ. «Իմ քայլը» խմբակցությունը Մարտի 1-ի հայտարարությունը, հնարավոր է, վավերացնի ԱԺ-ում. ՏԵՍԱՆՅՈՒԹ
Քաղաքականություն
01.03.2019 | 12:13
10 զոհերի սպանությունը չի կարող մնալ անպատիժ. «Իմ քայլը» խմբակցությունը Մարտի 1-ի հայտարարությունը, հնարավոր է, վավերացնի ԱԺ-ում ԱԺ «Իմ քայլը» խմբակցությունը հանդես է եկել 2008 թ. մարտի 1-ի իրադարձություններին վերաբերող հայտարարությամբ, որն Ազգային ժողովում ներկայացրեց խմբակցության ղեկավար Լիլիթ Մակունցը:
Նա նախ կարևորեց 2008-ի Մարտի 1-ի, դրան նախորդած և հաջորդած իրադարձություններին քաղաքական գնահատական տալու անհրաժեշտությունը՝ ընդգծելով Հայաստանում խաղաղ, առանց զենքի հավաքների անցկացման իրավունքի անարգել իրացման, երաշխավորման անհրաժեշտությունը, արժևորելով հանրային համերաշխության արմատավորումը և այլ դրույթներ:
Լիլիթ Մակունցը ներկայացրեց մի քանի կետից բաղկացած հայտարարությունը:
«1. Մարդու իրավունքների և հիմնարար ազատությունների պատշաճ պահպանման, Մարտի մեկի իրադարձությունների բազմակողմանի, լրիվ և օբյեկտիվ քննության արդյունքում մեղավորներին պատասխանատվության ենթարկելը պատմական հրամայական է, որն ուղերձ կհանդիսանա ՀՀ-ի բոլոր իշխանություններին, երկրի նորագույն պատմության ամենասև էջերից մեկի կրկնությունը բացառելու, արդարության և համերշխության վերականգնման, ինչպես նաև ժողովրդավարության ամրապնդման համար:
2. Մարտիմեկյան իրադարձությունների հետևանքով վիրավորվածներին և զոհերի իրավահաջորդներին տրամադրել արդարացի փոխհատուցում:
. Կյանքի իրավունքի պաշտպանությունը պետության առաջնային պարտականությունն է, ըստ այդմ՝ ՀՀ քաղաքացիներ Տիգրան Խաչատրյանին, Զաքար Հովհաննիսյանին, Գոռ Քլոյանին, Դավիթ Պետրոսյանին, Արմեն Ֆարմանյանին, Սամվել Հարությունյանին, Տիգրան Աբգարյանին (զինծառայող), Գրիգոր Գևորգյանին, Հովհաննես Հովհաննիսյանին, Համլետ Թադևոսյանին մահ պատճառելը որևէ հիմնավորմամբ չի կարող արդարացվել կամ մնալ անպատիժ:
4. Հիշում և հարգանքի տուրք ենք մատուցում մարտիմեկյան զոհերի հիշատակին և հանձն առնում ջանքեր գործադրել՝ թե՛ օրենսդրական մակարդակում, թե՛ առհասարակ քաղաքական մշակույթում այնպիսի փոփոխություններ իրականացնել, որոնք երաշխիքներ կստեղծեն՝ հետայսու բռնությունը և քաղաքական ճնշումները ներհասարակական գործընթացներում բացառելու, քաղաքացիների կողմից իրենց հիմնարար իրավունքները և ազատություններն անկաշկանդ իրացնելու ուղղությամբ»,- մասնավորապես ասված է հայտարարությունում:
Մակունցը նշեց, որ այս հայտարարությունը, հնարավոր է, հետագայում ներկայացվի որպես ԱԺ հայտարարության նախագիծ: Մանրամասները՝ տեսանյութում:
Նարեկ Կիրակոսյան
