10.10.2026 | 21:37
Կանանց Հայաստանի հավաքականը ոչ-ոքի խաղաց Ինդոնեզիայի հետ
Նոր զարգացումներ «Golden Palace» հյուրանոցի շուրջ. Պետգույքի կոմիտեն գույքագրում է սկսել
Քաղաքականություն
28.02.2019 | 20:30
Հայաստանի Մաքսային կոմիտեի նախկին նախագահ Արմեն Ավետիսյանի՝ Ծաղկաձորում գտնվող «Golden Palace» հյուրանոցի շուրջ նոր զարգացումներ են տեղի ունենում: Պետական գույքի կառավարման կոմիտեն հյուրանոցում իրականացնում է առկա շարժական գույքի գույքագրման և գնահատման աշխատանքներ: Այս մասին Factor.am-ի գրավոր հարցմանն ի պատասխան տեղեկացնում են վարչապետի աշխատակազմի հասարակայնության և լրատվության վարչությունից:
Հիշեցնենք, որ ՀՀ վարչապետ Նիկոլ Փաշինյանը ԱԺ արտահերթ ընտրությունների քարոզարշավի ժամանակ հայտարարել էր, թե Արմեն Ավետիսյանը ցանկություն է հայտել իր այդ շքեղ հյուրանոցը նվիրել պետությանը: Փաշինյանը նաև ասել էր, որ այդ հյուրանոցն արժե մինչև 20 մլն դոլար:
Հիշեցնենք նաև, որ ԱԱԾ-ն հայտարարություն էր տարածել 2001-2008 թվականներին Մաքսային պետական կոմիտեի նախագահ Արմեն Ավետիսյանի վերաբերյալ: Ըստ հաղորդագրության, ԱԱԾ քննչական վարչությունում հարուցվել է քրեական գործ Ավետիսյանի կողմից ձեռնարկատիրական գործունեությանն ապօրինի մասնակցելու և հանցավոր ճանապարհով ստացված առանձնապես խոշոր չափերով գումարներն օրինականացնելու համար:
Ազգային ժողովի նախկին պատգամավոր, գեներալ Մանվել Գրիգորյանը, որը ևս անցնում է քրեական գործով, ցանկություն է հայտնել պետությանն անշարժ գույք նվիրաբերել: Խոսքը Գրիգորյանին պատկանող «Ակնալճի կողբաբուծական տնտեսություն» ԲԲ ընկերությանը սեփականության իրավունքով պատկանող 329 հեկտար մակերեսով տարածքի մասին է:
Կառավարության աշխատակազմից, հղում անելով Հատուկ քննչական ծառայությանը, փոխանցում են, որ Մանվել Գրիգորյանի քրեական գործով դեռևս լիարժեք հստակեցված չէ պետությանը պատճառված նյութական վնասի չափը: «Հաշվի առնելով նշվածը՝ նախաքննության ներկա փուլում նյութական վնասի վերականգման հարցի քննարկումը ժամանակավրեպ է»,- ասված է մեզ տրամադրված պատասխանում:
Factor.am-ը վարչապետի աշխատակազմից հետաքրքրվել էր, թե կան այլ անձինք, որոնք ցանկություն են հայտնել պետությանը շենք-շինություններ կամ այլ անշարժ գույք նվիրաբերել: Կառավարությունից փոխանցել են, որ որևէ մեկն այդ հարցով Պետական գույքի կառավարման կոմիտե չի դիմել:
Նարեկ Կիրակոսյան
