05.01.2025 | 21:53
Մատուցվեց Սուրբ ծննդյան ճրագալույցի պատարագ․ ԼՈՒՍԱՆԿԱՐՆԵՐ
Եթե խնդիրը գնալու է ռազմական գործողությունների վերսկսմանը, մենք չենք հապաղելու․Դավիթ Տոնոյան
Քաղաքականություն
26.02.2019 | 12:21
Պաշտպանության նախարար Դավիթ Տոնոյանը երեկ «Առաջին ալիք»-ին տված հարցազրույցում անդրադարձել է սահմանին ռազմական գործողությունների վերսկսման հավանականությանը և նշել, որ այդ պարագայում հայկական կողմը չի հապաղելու:
«Եթե խնդիրը գնալու է ռազմական գործողությունների վերսկսմանը, մենք չենք հապաղելու»,- ասել է պաշտպանության նախարարը։
Հարցին, հարձակվելո՞ւ ենք նաև, նախարարն արձագանքել է. «Իսկ ինչո՞ւ ոչ»։
Իսկ սպառազինությունների մրցավազքում արդյոք կարո՞ղ ենք հասնել Ադրբեջանին․ «Ո՛չ քանակական առումով, ո՛չ ժողովրդագրական առումով, ո՛չ տնտեսական առումով հավասար չենք կարող լինել (Ադրբեջանի հետ-խմբ.): Դրա համար մենք ավելի շատ ուշադրություն դարձնելու ենք որակական խնդիրներին: Մենք այնպիսի ձեռքբերումներ ենք իրականացնում, որոնք կարող են մեզ հնարավորություն տալ հակառակորդի հնարավոր նկրտումները չեզոքացնել»։
Անդրադառնալով հայկական բանակը հարձակողական զենքերով համալրելուն՝ Դավիթ Տոնոյանը նշել է, որ բանակում փոխվում է այդ հարցի վերաբերյալ հոգեբանությունը․ «Փոխվում է հոգեբանությունը, մոտեցումը, քանի որ պաշտպանության մեջ գտնվող բանակները միշտ պարտություն են կրել։ Մենք չենք պատրաստվում մնալ պաշտպանական դիրքերում»։
Իսկ ինչ վերաբերում է ՀՀ ԶՈՒ-ի կողմից ձեռք բերված Սու-30ՍՄ տեսակի կործանիչներին ու դրանց վերաբերյալ հնչող քննադատություններին, թե դրանք գնվել են թանկ գնով, ապա պաշտպանության նախարարը պատասխանել է․ «Ի՞նչ է նշանակում՝ գործարքը թանկ է։ Ինչի՞ հետ են համեմատում։ Եթե մենք Սու-30ՍՄ-ի միջոցով կարողանում ենք առաջնագծից հարյուրավոր կմ հեռավորության վրա արդյունավետ խնդիրներ իրականացել, խնայել տասնյակ և հարյուրավոր զինվորների կյանքեր, ապա ի՞նչ թանկարժեքության մասին է խոսքը։ Նախկինում էլ, այսուհետ ևս մեր զինծառայողի կյանքը մեզ համար ամենից թանկն է, և մենք գտնելու ենք էֆեկտիվ լուծումներ հակառակորդին զսպելու և հաղթելու»։
Աղավնի Սուքիասյան
