20.05.2026 | 18:10
Ծառուկյանը պնդում է՝ «Արարատցեմենտն» օրինական է մասնավորեցրել // Վիզաների ազատականացումն ավելի մոտ է․ ԼՈՒՐԵՐ
Թուրքիան դատապարտել է ապրիլի 24-ը Հայոց ցեղասպանության հիշատակի օր հռչակելու՝ Մակրոնի որոշումը
Քաղաքականություն
06.02.2019 | 13:42
Թուրքիան դատապարտել է ապրիլի 24-ը Հայոց ցեղասպանության հիշատակի օր հռչակելու՝ Ֆրանսիայի որոշումը, որի մասին հայտարարել է երկրի նախագահ Էմանուել Մակրոնը: ՏԱՍՍ-ի փոխանցմամբ՝ այս մասին հայտարարել է Թուրքիայի նախագահ Ռեջեփ Թայիփ Էրդողանի ներկայացուցիչ Իբրահիմ Քալընը:
«Մենք վճռականորեն դատապարտում ենք նախագահ Էմանուել Մակրոնի հայտարարությունը, որում նա հաղորդել է ապրիլի 24-ը հայերի ցեղասպանության հիշատակի ազգային օր հռչակելու մասին: Հայերի ցեղասպանության մասին պնդումները քաղաքական սուտ են, հակասում են պատմական փաստերին և իրավական հիմքեր չունեն»,- ասվում է Քալընի տարածած հայտարարությունում:
Նա նաև ասել է, որ Անկարան «դատապարտում և անընդունելի է համարում քաղաքական իրադարձությունները պատմական գործիքի վերածելու՝ Մակրոնի ձգտումը, որպեսզի ինչ-որ կերպ փրկի քաղաքական ճգնաժամ ապրող իր երկրում տիրող իրավիճակը»:
Էմանուել Մակրոնը, հիշեցնենք, փետրվարի 5-ի երեկոյան հայտարարել էր, որ ապրիլի 24-ը Ֆրանսիայում նշվելու է որպես Հայոց ցեղասպանության հիշատակի օր:
Հայոց ցեղասպանության ճանաչման հարցը պարբերաբար բախումներ է առաջացնում Թուրքիայի և ԵՄ անդամ երկրների միջև: Մակրոնն իր որոշման մասին նախապես տեղեկացրել է Թուրքիայի նախագահ Էրդողանին՝ նշելով, որ ցանկանում է Թուրքիայի հետ բաց երկխոսություն ունենալ։
«Թուրքիայի հետ որոշ անհամաձայնություններ ունենք՝ կապված Իսլամական պետության, մարդու իրավունքների, ինչպես նաև Ցեղասպանության հետ»,- նշել է Մակրոնը:
