Քաղաքականություն
06.02.2019 | 11:49
Ֆրանսիայի նախագահ Էմանուել Մակրոնը երեքշաբթի՝ փետրվարի 5-ի երեկոյան հայտարարությամբ է հանդես եկել՝ հայտնելով, ապրիլի 24-ը Ֆրանսիայում նշվելու է որպես Հայոց ցեղասպանության հիշատակի օր: Այս մասին տեղեկանում ենք euronews.com-ից:
Նշենք, որ Հայոց ցեղասպանության ճանաչման հարցը պարբերաբար բախումներ է առաջացնում Թուրքիայի և ԵՄ անդամ երկրների միջև: Մակրոնն իր որոշման մասին նախապես տեղեկացրել է Թուրքիայի նախագահ Էրդողանին՝ նշելով, որ ցանկանում է Թուրքիայի հետ բաց երկխոսություն ունենալ։
«Թուրքիայի հետ որոշ անհամաձայնություններ ունենք՝ կապված Իսլամական պետության, մարդու իրավունքների, ինչպես նաև Ցեղասպանության հետ»,- նշել է Մակրոնը:
Դեռ 2017-ին Ֆրանսիայի հայկական կազմակերպությունների համակարգող խորհրդի ամենամյա ճաշկերույթի ընթացքում Մակրոնը նշել էր, որ Ֆրանսիան 1915-ի ոճրագործությունը դատապարտող առաջին երկրներից է:
Հիշեցնենք, որ Ֆրանսիան Հայոց ցեղասպանությունը ճանաչել է 2001 թվականին:
Նելլի Մելքոնյան
