Դպրոցական ծրագրերում ներառված առարկաները կվերանայվեն. նախարար. ՏԵՍԱՆՅՈՒԹ

Բոլոր հայագիտական առարկաները վերանայվելու են, ուսումնական ծրագրերը՝ նույնպես, և մինչև 2023 թվականն ունենալու ենք ամբողջությամբ նոր առարկայացանկ: Այս մասին հունվարի 31-ին ՀՀ կառավարության նիստից հետո լրագրողների հետ ճեպազրույցում ասաց կրթության և գիտության նախարար Արայիկ Հարությունյանը:

«Ես կարևորում եմ բոլոր հայագիտական առարկաները, պարզապես բոլոր առարկաները, այդ թվում՝ հայագիտականները, վերանայվելու են»,- ասաց նախարարը՝ նշելով, որ այդ մասին ասել է Ազգային ժողովի բարձր ամբիոնից, և վերանայումը վերաբերելու է նաև Հայ եկեղեցու պատմություն առարկային:

Նախարարը նշեց, որ իրականացվելիք բովանդակային վերանայումների պատճառներից է այն, որ կան բողոքներ աշակերտների ծանրաբեռնվածության և ծրագրերի անհամապատասխանությունների հետ կապված: «Կան բողոքներ նաև տարբեր առարկաներում նույնաբովանդակ նյութերի մատուցման հետ կապված, այսինքն՝ նույն Հայ եկեղեցու պատմության, Հայրենագիտության, Հայ ժողովրդի պատմության, Ռազմագիտության, նույնիսկ Երգի դասագրքերում կան կրկնություններ: Ծնողները շատ են բողոքում, որ երեխաները շատ ծանրաբեռնված են»,- նշեց նախարարը՝ հավելելով, որ քննարկվողների թվում է նաև Շախմատ առարկան:

Արայիկ Հարությունյանը նաև նշեց, որ վաղը տեղի կունենա քննարկում՝ կապված դասագրքերի ծանրության հետ. «Դասագրքերի ծանրության հետ կապված բազմաթիվ բողոքներ կան: Գուցե որոշում և լուծում լինի, որ դասագրքերը լինեն երկհատոր՝ առաջին և երկրորդ կիսամյակների համար»: Դասագրքերի բովանդակային վերանայումները, ըստ նախարարի, կիրականացնեն մասնագետները:

Ինչ վերաբերում է ոչ պրոֆեսիոնալ ուսուցիչների խնդրին, նախարարը նշեց, որ կմշակվեն մեխանիզմներ, որ ժամանակի ընթացքում պրոֆեսիոնալները մնան դպրոցում:

Մանրամասները՝ տեսանյութում

Աղավնի Սուքիասյան