14.10.2026 | 10:32
Արտարժույթների փոխարժեքները՝ հոկտեմբերի 14-ի դրությամբ
Ներկայացվել է «Հանրակրթական դպրոցների մատչելիությունը. օրենքը գործնականում» մասնակցային մոնիտորինգի զեկույցը
Հասարակություն
08.01.2019 | 16:01
«Հաշմանդամություն և ներառական զարգացում» հասարակական կազմակերպության (ՀԿ) կողմից իրականացված «Հանրակրթական դպրոցների մատչելիությունը. օրենքը գործնականում» մասնակցային մոնիտորինգն իրականացվել է «Թրանսփարենսի Ինթերնեշնլ հակակոռուպցիոն կենտրոն» ՀԿ-ի «Պահանջատեր հասարակություն՝ հանուն պատասխանատու կառավարման» ծրագրի շրջանակներում, ԱՄՆ Միջազգային զարգացման գործակալության (USAID) աջակցությամբ։
Մոնիտորինգի նպատակն է ուսումնասիրել 2007թ․ հետո Երևանում, Գյումրիում և Վանաձորում կառուցված և վերակառուցված թվով 20 հանրակրթական ուսումնական հաստատությունների համապատասխանությունը Հայաստանի Հանրապետության (ՀՀ) քաղաքաշինության նախարարի մատչելիության շինարարական նորմերի մասին հրամանին:
Մոնիտորինգի արդյունքների վերլուծությունը թույլ է տալիս ընդհանուր պատկերացում կազմել ուսումնասիրման ենթարկված 20 դպրոցների շինությունների՝ մատչելիության նորմերին համապատասխանության մասին։ Արդյունքները ցույց են տալիս, որ մատչելիության շինարարական նորմերը կարգավորող՝ ՀՀ քաղաքաշինության նախարարի համապատասխան հրամանը ամբողջությամբ չի կիրարկվել, իսկ որոշ դեպքերում՝ ամբողջությամբ և կոպտորեն խախտվել է։ Ըստ այդմ՝ կարելի է պնդել, որ ուսումնասիրված հանրակրթական դպրոցները անհասանելի են հաշմանդամություն ունեցող աշակերտների համար, քանի որ մեծամասամբ չեն համապատասխանում մատչելիության չափանիշներին։
