18.05.2026 | 23:42
«Անկախ դիտորդ»-ը պահանջում է ազատ արձակել Արթուր Օսիպյանին և պարզաբանում տալ նրա ձերբակալության հիմքերի վերաբերյալ
Հայաստանը որևէ բանակցություն չի վարում երրորդ երկրի զինծառայողների տեղակայման հարցով. ԱԳՆ խոսնակ
Քաղաքականություն
20.12.2018 | 13:36
Հայաստանը որևէ բանակցություն չի վարում հանրապետության երրորդ երկրի զինծառայողների տեղակայման հարցով: Դեկտեմբերի 20-ին լրագրողների հետ ճեպազրույցում ասաց ՀՀ ԱԳՆ մամուլի խոսնակ Աննա Նաղդալյանը՝ անդրադառնալով ՌԴ ԱԳ նախարար Սերգեյ Լավրովի հայտարարությանը, որը տարատեսակ մեկնաբանությունների առիթ էր հանդիսացել:
«Այս հարցով հստակ կարող եմ ասել, որ սանիտարահամաճարակային վերահսկողության ոլորտը հայ-ռուսական համագործակցության մաս է կազմում, և այդ հարցի շուրջ կա երկխոսություն»,- նշեց նա:
Ինչ վերաբերում է կենսաբանական լաբորատորիաներին և այնտեղ օտարերկրյա զինծառայողների տեղակայման հարցով քննարկումներին, ԱԳՆ խոսնակն ընդգծեց, որ դրանք պատկանում են Հայաստանին, բացառապես քաղաքացիական բնույթ են կրում և այնտեղ աշխատում են բացառապես հայ մասնագետներ:
«Հայաստանի պարագայում ռազմական ներկայության խնդիր չկա: Միաժամանակ, պետք է ասեմ, որ Հայաստանը որևէ բանակցություն չի վարում մեր երկրի տարածքում երրորդ երկրի զինվորների տեղակայման հարցով»,- հավելեց Աննա Նաղդալյանը:
Հիշեցնենք, որ ՌԴ ԱԳ նախարարն օրերս «Կոմսոմոլսկայա պրավդա»-ին տված հարցազրույցում, պատասխանելով Հայաստանում կենսաբանական լաբորատորիաների մասին հարցին, ասել էր, որ Մոսկվան և Երևանն ավարտում են մի փաստաթղթի նախապատրաստումը, որը երաշխավորելու է Հայաստանի կենսաբանական լաբորատորիաներում օտարերկրյա զինծառայողների բացակայությունը:
