Չի կարելի քաղաքականացնել հարցը. ՌԴ դեսպանը՝ Գյումրիում ռուս զինծառայողի կողմից հայ կնոջ սպանության մասին

Անթույլատրելի է հարցը քաղաքականացնելը: Դեկտեմբերի 18-ին լրագրողների հետ զրույցում այս մասին ասաց Հայաստանում ՌԴ դեսպան Սերգեյ Կոպիրկինը՝ անդրադառնալով Գյումրիում ռուսական ռազմաբազայի զինծառայողի կողմից 57-ամյա կնոջ սպանության գործին: Այդ մասին լրագրողի հարցը, ի դեպ, ռուս դիվանագետին դուր չեկավ. «Այնպիսի տպավորություն է, որ մեր զինծառայողները մեկը մյուսի հետևից հանցագործություն են կատարում: Եվ ամեն անգամ մենք բախվում ենք այդ խնդրին»:

«Ես ինձ իրավունք չեմ վերապահում մեկնաբանել գործի մանրամասները: Դա քննության գործն է, որն իրականացվում է հայկական օրենսդրության և այն իրավական-պայմանագրային փաստաթղթերի հիման վրա, որոնք կարգավորում են Հայաստանի տարածքում ռազմաբազայի գործունեությունը»,- հավելեց Կոպիրկինը:

Դեսպանը ևս մեկ անգամ ցավակցություն հայտնեց սպանված կնոջ հարազատներին՝ հավելելով, որ հանցագործությունը պետք է հետաքննվի և մեղավորը պետք է պատժվի. «Բայց, մեր կարծիքով, անընդունելի է գործը քաղաքականացնելը: Դա չի նպաստի քննության ո՛չ անաչառությանը, ո՛չ էլ արդյունավետությանը: Եկեք չխանգարենք նրանց»:

Սերգեյ Կոպիրկինը, միաժամանակ, պնդեց, որ ՌԴ դեսպանատունը չի հերքել լուրը: «Հիշեցնեմ իրադարձությունների շղթան: Երբ դա տեղի ունեցավ, քննությունն ընդհանրապես պատահարի մասին որևէ վարկած չուներ, սակայն հենց առաջին օրերին որոշակի ուղղվածությամբ լրատվամիջոցներում միանշանակ այն միտքն էր հնչում, որ հետքերը 102-րդ ռազմաբազա են տանում: Մինչ այն պահը, երբ քննությունը կանգ առավ ինչ-որ վարկածի վրա: Դա քննության և հասարակական կարծիքի ուղղորդում էր»,- նշեց դեսպանը՝ ընդգծելով, որ հենց դրա դեմ են իրենք հանդես եկել:

Հիշեցնենք, որ Գյումրիում 57-ամյա Ջուլիետա Ղուկասյանի սպանության մեջ կասկածվող ռուս զինծառայողը կալանավորված է, նա պահվում է 102-րդ ռազմաբազայի տարածքում: